Covalima (RCCT) 15-01-25- Konsellu Kombatente Libertasaun Nasional (CCLN-Sigla Portuguesa) Munisipiu Covalima Kuarta ne’e taka ona naran veteranu rejistadu tinan 2009 hamutuk ema Rihun Sia Atus Sia Tolu Nulu Resin Sia.
Sekretariu Konsellu Kombatente Libertasaun Nasional, Joaquim Barros “Sikat Let” informa ba jornalista sira iha ninia kna’ar fatin aldeia Tabako Lot katak, tuir kalendariu hosi nasional fo sai hahu loron 15 fulan no tinan ida ne’e munisipiu 12 inklui Covalima sei taka sai lista kona-ba veteranu sira ne’ebe rejistu iha 2009, tanba ne’e mak ita hahu taka ona iha postu administrativu 7 nune’e husu atu ida-idak bele hakbesik aan ba hodi haree.
“Tuir presedimentu legal Ministeriu Asuntu Kombatente Libertasaun Nasional maka trata asuntu ida ne’e, nune’e ami hetan konvite husi prezidente konsellu nasional iha loron 12 fulan Janeiru 2025 konsellu munisipal sira hotu tuun ba iha nasional hodi asina edital ne’ebé fo sai ona ninia rezultadu final husi prosesu verifikasaun iha 2019 mai to’o 2022 nian, iha asinatura edital ne’e mak ohin loron 15 fulan Janeiru 2025 tuir kalendariu ministeriu anivel nasional katak, teritoriu tomak inklui Covalima halo distribuisaun hodi ba taka lista iha postu administrativu 7,” relata Joaquim Barros “Sikat Let”.
Hatutan nia, lista ne’ebé fo sai daudaun liuhusi prosesu rekollamentu dadus sira ne’ebé mai ho ninia kategoria diferente inklui ho sira ne’ebe hetan validasaun no sira ne’ebe la hetan.
“Sim ne’e prosesu liu husi dadus ne’ebé ita rekolla, maibe iha ne’eba ninia kategoria la hanesan, ida ba kategoria 20 ba 24 anos, kategoria ida seluk ba 15 A 19, depois kategoria ida 8 ba 14 anos, no tuir alterasaun ba lei ne’ebé foin aprova iha 2024 nian ne’e maka iha 3 A 7 anos, uluk iha 4 a 7 mas agora 3 A 7 anos, depois iha mos inkapasidade kerdizerke ne’ebé moras ruma kauza husi funu nian sira mos naran taka hotu iha ne’eba. Iha Covalima total ema ne’ebé rejistu 2009 nian ne’e hamutuk 9939, (husi numeru ne’e) ema ne’ebé hetan validasaun hamutuk na’in 8720, no ne’ebé la partisipa iha validasaun 1.219” nia reforsa.
Entretantu, husi numeru veteranu ne’ebe rejistu iha tinan 2009 ho total Rihun Sia resin ne’e, ne’ebe tama ba kategoria 20 A 24 ema na’in ida de’it, kategoria 8 A 14 ho total 348, kategoria inkapasidade hamutuk na’in 24, kategoria ne’ebe passa ba martir total hamutuk na’in 1.765, enkuantu ba kategoria 3 A 7 anos ho total 1.600, depois ba sira ne’ebe ninia partisipasaun menus husi 3 anos hamutuk na’in 3. 971, numeru ne’ebe la tama ba kategoria kombatente iha Covalima hamutuk na’in 210, la tama ba kategoria martir hamutuk na’in 345.
Alende ne’e, iha Covalima rasik mos iha lista pendente ho total ema hamutuk na’in 398, kategoria rejistu repetidu ema hamutuk na’in 53, no ne’ebe la mai valida hamutuk 1.219, hosi konta ne’e hotu maka total ne’ebe mai rejistu iha tinan 2009 ema hamutuk 9.939.
Jornalista : Julio Salinas
Editor : Chamot Nahac
