Inan Faluk Amelia Cardoso Hetan Apoio Material Konstruksaun Uma Husi Eis Presidente da Republika Jose Ramos Horta.

Covalima (RCCT) 22-01-21-Amelia Cardoso, Inan Faluk ida nebe antes muda ba hela iha Aldeia Tabako lot, Suco Debos, Amelia ho nia bei oan na’in 2 halo uma hodi hela iha ema nia rai iha Suco Oges, maibe rai na’in husu Amelia tenki muda ka sai husi fatin nebe nia hela mak Amelia ho nia bei oan na’in 2 Obrigado muda ba hela iha nia Rai rasik iha Aldeia Tabako Lot Suco Debos iha Outubro 2020.

Relasiona ho situasaun nebe mak Amelia ho nia familia ki’ik infrenta, Eis-Presidente da Republika Dr. Jose Ramos Horta, Liu husi fiar ba Emprezario Covalima Oan iha Nasional Tony Lopes Quinta Feira (21-01-21) lori ona ajuda material konstrusaun uma mai ajuda Amelia Cardoso nia familia.

Ba RCCT Tony Lopes hanesa xefe ekipa iha ajuda kuminitario informa, apoio baziku ba konstruksuan uma, ne’e mai husi Eis-Prezidente da Republika Dr. Jose Ramos Horta, nune’e bele responde ba situasaun nebe inan faluk Amelia ho nia bei oan na’in 2 hasoru dadaun.

Tony Lopes afirma, apoio ne’e apoio basiku atu bele hodi hari uma ida nebe razoavel nune’e bele ajuda ferik Amelia nia familia, no material sira ne’e mak hanesan; Semente, Ai no besi beton, no mos sasan nebe seluk nebe presija hodi kompleta ba konstrusaun uma ne’e.

“Ne’e apoio basiku ba halo uma ida hanesan iha tempu Bapa karik sira bolu Rumah Sangat Sederhana (RSS), la’os apoio atu halo uma ida nebe luxu, uma ida nebe razoavel ba ferik bele hela ba ho nia oan sira, material ne’e hotu husi Dr. Ramos Horta, Katuas husu ha’u hanesan ema suai oan atu lori mai, sasan nebe nia (Ramos Horta) aranja iha ne’e pratikamente sasan nebe presiza ba atu halo uma simples ida ne’e ba ferik no nia oan sira atu hela ne’e kompletu ona iha ne’e.”Dehan Toni Lopes ba RCCT iha Tabakolot, Suco Debos, Quinta Feira (21-01-21)

Tony Lopes hatutan, depois de konstrusaun uma ne’e, sei iha tan ajuda sasan uma laran nian nebe sei fornese mos husi Eis-Presidente da Republika Dr. Ramos Horta.

Tony dehan sasan sira nebe sei tuir mai ne’e Inan Faluk Amelia Cardoso ho nia familia ki’ik sei simu direita husi Eis- Presidente da Republika Jose Ramos Horta.

 “Dr. Jose Ramos Horta mak husu ha’u ajuda lori mai Suai, Dr Ramos hatete ba ha’u, nia sei aranja tan kama, kulsaun, bikan, kanuru no seluk tan, kuandu uma ne’e pronto Dr. Ramos Horta sei mai iha ne’e atu intrega sasan sira ne’e ba ferik Amelia,” Tenik Toni Lopes.

Iha fatin hanesan Xefe Aldeia Tabakolot Sergio Gusmão sente orgullu ho apoio hirak ne’e, nia (Sergio) promete sei organiza joven sira iha Aldeia Tabakolot hodi ajuda hari ne’e uma ba inan faluk Amelia ho voluntariamente.

“Senti orgulhu tebes-tebes bainhira sasan sira ne’e mai no mos ha’u sei organiza joven sira ka badaen balun atu halo ferik Amelia nia uma, tanba tuir informasaun katak uma ne’e sei konstrui ho tempo durante semana tolu nia laran, tan ami pronto ho voluntario atu ajuda.” Dehan Xefe Aldeia Tabakolot Sergio Gusmão,

Liga ba ajuda nebe Simu, Inan Faluk Amelia Cardoso expresa nia sentimentu, hodi hato’o agradese wa’in ba Avo Ramos.

“Sasan ha’u Simu hotu ona, nebe ha’u hato’o ha’u nia obrigado wa’in ba Avo” Dehan Amelia Cardoso ho expresaun nebe nakonu ho kontenti kahur triste nebe hafalun nia fuan.

Engkuantu Emprezario Covalima Oan Tony Lopes dehan, durante halo servisu ba konstrusaun uma ba ferik Amelia, nia (Tony) sei kontribui mos hahan ba badaen no juven sira durante oras servisu.

Reportazen      :Ade Gorete & Tynhu Gusmão

Editor              : Chamot Nahac