COVALIMA—Diretór Servisu Munisipal Jestaun Merkadu no Turismu (SMJMT) Covalima, Vitorino do Carmo, hatete durante ne’e foin halo sensibilizasaun kona-ba turismu Komunitaria, tanba ne’e mak iha Covalima sei dauk halo identifikasaun kona-ba fatin turismu.
“Iha tinan 2022 foin maka tinan primeiru ami halo planu no asaun, tan ne’e ami foin halo sensibilizasaun kona-ba turismu Komunitaria, ne’ebe ami seidauk halo identifikasaun kona-ba fatin turismu nian iha Covalima” informa Diretór Servisu Munisipal Jestaun Merkadu no Turismu (SMJMT) Covalima, Vitorino do Carmo, ba jornalista sira iha nia kna’ar fatin Bairo Costa, Suai Kinta (12/01).
Nia haktuir sei dauk halo identifikasaun fatin turismu tanba buat ne’e ketak, bainhira halo identifikasaun ba nia fatin ne’e buat ketak ida, depois fo konesimentu ba ema hotu atu bele konese turismu no fatin turismu.
Iha Covalima SMJMT iha planu duni maibe foin halo sensibilizasaun tanba iha momentu ne’eba sei menus rekusu, foin halo rekrutamentu ba xefe departamentu kona-ba turismu Komunitaria nian iha fulan Novembru 2022 liu ba ne’e.
“Ami iha planu duni, maibe planu ne’e foin maka halo sensibilizasaun tanba momentu ne’e hau diretór ho kazual mesak deit xefe departamentu sira sei dauk halo rekrutadu, ne’ebe foin rekruta iha fulan Novembru tinan 2022, iha tempu ne’eba ami foin halo sensibilizasaun kona-ba turismu Komunitaria nian iha postu administrativu 7, maibe ami seidauk identifika fatin ne’ebe ita bele halo sai fatin turismu komunitaria” nia dehan.
Vitorino sublina ba tinan ida ne’e foin atu bele identifika fatin tanba xefe departamentu iha ona ba futuru SMJMT sei realiza fatin istoriku sira kona-ba turismu relijiozu, fatin turismu kultural, fatin istoriku uluk funu Japaun nian buat sira ne’e hotu mak sei halo identifikasaun.
Nia dehan bainhira identifika hotu maka foin halo sira ne’e sai diak hotu hodi atrai turista lokal no mos turista internasional sira vizita bainhira dezenvolve diak ona fatin sira ne’ebe mensiona.
Vitorino garante iha tinan ida ne’e nia laran hahu halo identifika ba fatin sira ne’e, tanba haree ba iha rekursu agora sufisiente, tinan kotuk labele identifika tanba sei menus rekursu labele halo buat ida.
Nia dehan bainhira prosesu identifika hotu ona halo planu hodi haree ba ninia prioridade mak foin bele foti desizaun ida ne’ebe mak atu halo uluk.(Azu)
