Covalima (RCCT) 29-05-24-Administrador Postu Administrativu (APA) Fatumea, Sejar Madeira, hatete durante tinan barak ona komunidade iha Aldeia-3 hanesan Aldeia Kalau Halek, Baleo, no Aldeia Mane Ki’ik, Suku Belulik Leten Postu Administrativu Fatumea kontinua halerik ba bee.
Nune’e Administrador Postu Administrativu (APA) Fatumea, Sejar Madeira Amaral, dehan tempu badak sei responde no fo asesu be ba komunidade aldeia tolu refere ne’ebé maka kabe ona Programa Nasional Dezenvolvimentu Suku (PNDS).
“Bee mos problema liu iha suku sentru liliu iha aldeia tolu maka hanesan Aldeia Baleo, Kalau Halek no Aldeia Mane Ki’ik, suku Belulik Leten, ita iha ona asaun balu, iha ona esforsu ne’ebé ita halo katak iha tempu badak kanalizasaun be ba Aldeia-3 ne’e sei halo no projetu ne’e sei responde husi Programa Nasional Dezenvolvimentu Suku (PNDS), sira nia prosesu tenderizasaun la’o ona, manan na’in mos iha ona ita hein de’it implementa kanalizasaun foun ba iha Aldeia Baleo no mos reabilitasaun ba iha Aldeia Mane Ki’ik no Kalau Halek, tanba iha aldeia rua refere sira nia sistema kanalizasaun be ne’e iha nanis ona, hein de’it reabilitasaun, problema maka aldeia Baleo konstrusaun ne’e sei lao iha tempu badak” informa APA Fatumea Sejar Madeira ba RCCT iha nia kna’ar fatin Administrasaun Postu Administrativu Fatumea, Segunda (27/05).
Autoridade Postu Fatumea ne’e esplika konaba kanalizasaun be mos ba komunidade aildeia 3 refere ne’ebé sei kontinua uza nafatin be matan tuan, naran We Kiar.
“Be matan ne’e nafatin deit, husi be matan ida ami bolu naran We Kiar, sira nia sistema atu dada ne’e maka tuir enjineriu sira nia dezeñu ne’e katak husi be matan ida ne’ebé agora ita iha ne’e, ida atu halo kanalizasaun ba Aldeia Baleo ne’e nia la tama ona ba iha tanki rezervatoriu ne’ebé iha leten dala ruma nia kanu ne’ebé halai depois to’o iha tanke rezervatoriu ne’e ketak, depois sira halo kanalizasaun sa’e tiha ba leten besik area Fatuk Taman hodi halo tan tanke rezarvatoriu boot ida iha ne’e hotu maka foin halo sistema reabilitasaun mai iha Aldeia Baleo maibe bee matan nafatin iha We Kiar” nia konta.
Entertantu Komunidade iha iha Suku Belulik leten Postu Administrativu Fatumea hamotuk ema na’in 2.423 ho total xefe família 687.
Jornalista : Julio Salinas
Editor : Chamot Nahac
