Ainaro (RCCT) 17-04-23, Jestora Asuntu Advokasia PLAN Internasional, Laura Menezes Lopes hatete, PLAN Internasional hamutuk ho parseiru lokal sira hanesan Asosiasaun Feto Munisipiu Ainaro no Fundasaun Patria hodi fasilita formasaun ba radio komunidade sira kona-ba asuntu sensivel jeneru oinsa atu bele transforma informasaun ho kualidade ba sidadaun sira.
“Objetivu prinsipal husi atividade ba loron rua nian maka ami hamutuk ho parseiru lokal hanesan Asosiasaun Feto Munisipiu Ainaro how’s Fundasaun Patria kolabora ho malul midia sira liliu radio komunidade atu bele fahe informasaun ba asuntu sensivel ba jeneru, protesaun ba labarik no mos hakbi’it abilidade atu fornese informasaun ida ne’ebe ho kualidade ba iha ita nia sidadaun hanesan edukasaun sivika no midia sira fo informasaun loloos kona-ba prosesu eleitoral ligadu ba iha eleisaun parlamentar 2023 nian” informa Jestora Asuntu Advokasia PLAN Internasional, Laura Menezes Lopes, ba jornalista sira hafoin fo formasaun ba jornalista sira iha salaun enkontru Administrasaun Postu Administrativu Ainaro Villa, Segunda (17/04).
Nia sublina atividade ba formasaun refere hala’o iha rejiaun 5, maka hanesan iha Dili, Baukau, Likisa nomos Ainaro, ba Munisípiu Ainaro rasik hala’o durante loron rua hahu iha segunda no remata iha Tersa, Dili hala’o tiha ona no mos iha Likisa no Baukau.
Nia haktuir iha rejiaun Ainaro rasik involve husi Radio Komunidade Kova Taroman (RCCT) Suai, Radio Komunidade Same no Radio Komunidade Turiskai, Radio Komunidade Mauloko Maubessi, Radio Komunidade Tata Mailau Ainaro, no Media online Lian Orluli Ainaro, inklui media officer partidu politiku sira iha Munisípiu Ainaro.
Nia esplika atividade ida ne’e realiza tanba hetan apoiu husi Fundasaun Patria Ainaro, hetan apoiu fundus tekniku husi PLAN Internasional inklui hetan apoiu husi doador União Europeia.
Laura afirma esperansa ba oin katak liu husi fahe informasaun durante loron rua espera katak maluk autores husi Radio Komunidade lokal no media partidu sira mos marka prezensa atu bele halo esforsu liu tan, atu nune’e fornese informasaun ho kualidade no balansu entre parte hotu ba komunidade.
Nia haklaken liu husi formasaun Radio Komunidade sira bele foti informasaun mos husi maluk feto sira nia lian no asuntu igualidade jéneru, promove feto iha vida politika.
Nia husu radio komunidade sira atu halo esfosu liu tan hodi bele involve maluk feto sira husi setor hotu liliu haree ba vida moris lor-loron nian, nune’e sira mos bele partisipa hodi fo sira nia hanoin liu husi radio komunidade, sira bele konteibui ideas diak iha prosesu dezenvolvimentu.
Prezidente Asosiasaun Asuntu Feto ba Dezenvimentu Munisipiu Ainaro Ana Maria Pereirra, haktuir formasaun ida ne’e foka liu ba media tanba media maka foti informasaun ne’ebe maka justu no adekuadu tuir buat ne’ebe maka jornalista haree iha baze, liliu ba iha eleisaun parlamentar nian.
Nia afirma kuadu ko’alia kona-ba igualdade serteza foka ba feto no mane.
“Iha ne’e ita koalia kona-ba igualdade konserteza ita foka ba feto no mane, maibe ami atu fo foka liu prióridade feto no maluk difisiente sira” nia hakotu. Entertantu formasaun durante loron rua hahu iha Segunda no remata iha tersa hetan partisipasaun husi PLAN Internasional, Fundasaun Patria, Asosiasaun Feto Munisipiu Ainaro, Radio Komunidade Mauloko Maubessi, Radio Komunidade Kova Taroman, Suai, Radio Komunidade Same, Radio Komunidade Tata Tata Mailau Ainaro, radio komunidade Turiskai, media online Lian Orluli Ainaro no media officer partidu politiku siraiha Munisípiu Ainaro.(JS)
