Covalima-RCCT-Pilipos Soares babain bolu Lipus, Tinan 45 hela iha Bairo foun, Aldeia Lohorai, Suco Matai Postu Administrativu Maukatar, Laen ba Sra. Maria Guterres Idade 37, no husi domin nebe lipus ho Maria Kuda hafuan oan feto ida naran Marciana Amaral nebe oras ne’e tama ona ba idade Tinan 6.
Lipus hatutan nia moris liu husi hala’o aktividade negosio iha luron, (negosiante Ambulante), dader san tuku 7 deit Lipus sai ona husi uma hodi ba faan iha kampo fute bola ladi nebe dok husi nia hela fatin kuaze kilo metro 4 resin. Sai husi uma Lipus dudu ninia karosa ain rua nebe halo husi solda Besi Beton no Besi baja, iha Karosa laran Lipus Tula Kaixote (Box) ida nebe nakonu kahur malu entre aqua Zelu fatuk(Es batu) hodi halo malirin be Aqua nebe iha Kaixote Laran, tula iha Karosa ne’e mos Lipus tetek tan Manu tolun, Sigaru LA no Marlboro, Mie Sedap Kaixa ida no Be mana iha termos ida.
La’o to’o iha ninia faan fatin Kampo Fute Bola Ladi, Lipus tur hein iha ai sarea malae (johar) nia okos hodi hein komprador sira atu mai sosa nia sasan. Hanesan Lipus haktuir katak nia hahu ninia aktividade ne’e iha tinan 2013 ho orsamentu dolares amerikanu $54.00.
Hatete ba Radio Cova Taroman iha tersa 29-09-20, lipus dehan kada loron nia hetan rendimentu husi husi nia aktividade fila liman ne’e minimu dolares amerikanu $5.00 maximu bele to’o dollares $20.
“Ha’u sai husi uma mai iha ne’e komesa tuku 7 dader, iha ne’e ha’u faan mak hanesan manu tolun, supermi, agua Pop Mei no sigaru, kada loron ida ha’u hetan kiik liu mak $5.00, barak liu ha’u bele hetan to’o $20.00” Dehan Lipus wainhira dada lina ho Jornalista RCCT Chamot Nahac iha Kampo Ladi Tersa (29-09-20).
Lipus mos dehan nia faan ninia sasan sira ne’e foku dei ba Sofer no Ajudante kareta(Bus) halai Suai-Dili, sira nebe hein pasajeiro (Pasang ret) iha Ladi.
“Ha’u faan deit ba Kareta sira nebe loro loron pasang ret iha iha ne’e, ha’u gosta faan ba sira tanba wainhira sira hakarak deve mos sira selu lalais deit, ohin sira deve, aban ka bain rua fila husi dili ne’e sira selu kedas, tan ne’e mak ha’u mai faan deit ba sira”.
Lipus hatuir fali nia Istoria pasadu waihira foin hahu nia Negosio, Lipus faan Manu Tolun Da’an no Sigaru, iha merkadu Suai Debos iha 2011, iha tempo neba Lipus sei K’losan no hafoin Lipus Hari uma kain ho nia kaben Maria iha 2012 Lipus muda falin ba hela iha Bairo Foun, Aldeia Lohorai, Suco Matai hodi hahu nia moris foun hamotuk iha nia familia Nazere.
“Ha’u hahu Ha’u Nia negosio iha tinan 2011 bainhira Ha’u sei klosan, primeiro Hau faan sasan iha merkadu Suai no depois iha debos, to’o iha tinan 2012 Hau hari’i familia ne’e mak ha’u muda fali ba hela iha Aldeia lohorai hodi kontinua faan sasan iha Fatin seluk Mak hanesan aero portu Suai no iha kampo fute bola Ladi”,hateten negosiante Ki’ik Pilipos Soares.
Lipus mos iha nia mehi nebe bo’ot katak iha tempo oin main nia hakarak sai negosiate nebe susesu no hakrak faan deit iha fatin permanente(iha uma deit), lakohi ona ba faen iha dalan ninin.
“agora ha’u halibur osan para aban bain rua hau hakarak faan deit iha fatin fatin permanente, ha’u hakarak halo uma ida para sai fatin ba hau hodi kontinua halo ha’u nia negosio”
Maibe lipus mos konfesa ba Jornalista RCCT wainhira halo konversa iha Kampo Ladi iha Lipus nia faan fatin, lipus hatete, durante ne’e liu husi halo negosio iha dalan ninin Lipus uja ninia rendimentu nebe hetan hodi sustena nia nesesidade iha uma laran;
“Durante ne’e ha’u ho familia hatutan moris depende deit ba osan nebe ha’u hetan liu husi faan sasan sira ne’e, osan sira ne’e balu ha’u rai, balu lori sosa fos, mina, no buat seluk iha uma laran ninia”
atu remata dada lian ho Lipus iha nia buka moris fatin, Lipus dehan ba jornalista RCCT, Moris ne’e tenki buka rasik, Lipus dehan “labele husi deit ba ema seluk atu ajuda ita, maibe ita nain tenki buka rasik, ita servisu mak foin hetan osan, se ita tur deit iha uma ne’e osan atu tama husi nebe?”Lipus Hakotu nia lian ho Inflasaun introgativu.
Jornalista : Chamot Nahac
Editor : RCCT
