Covalima-RCCT Secretario de Estadu Peskas halo vizita ba Suco Suai Loro hodi fahe material peskas ba komunidade peskadore hamotuk ema nain 75 iha Suco Suai Loro Postu Admnistrativu Suai, Municipio Covalima.
Iha okaziaun ne’e Sec. Estado Peskas, Elidio de Araujo hateten, paroveitta vizita ne’e Sec. Estadu mos hakarak atu rona preokupasaun balu husi peskadores sira iha Sucu Suai Loro, hafoin fahe material peskas ba komunidade peskador sira iha Sucu refere. Dehan Secretario Estadu e Peskas Elidio de Araujo liu husi ninia deskursu iha vizita ba komunidade sira iha Suco Suai Loro Quarta Feira 21-10-20.
“Objectivo husi ha’u nia vizita ida ne’e, atu distribui material peskas nian ba maluk sira iha Suco ne’e, no mos atu hasoru malu ida ne’e ha’u haakrak rona prekupasaun no problema ruma nebe maluk peskador sira hasoru” dehan Secretario Estadu Peskas Elidio de Araujo.
Secretario Estadu ne’e Afirma Peskadores iha moris iha kostaria hamotuk ema rihun rua resin mak durante sustenta ninia familia liu husi aktividade peskas ninian, tan ne’e governu labele haluha no tenki tau matan ba peskadores hirak ne’e nia moris.
“iha ha’u nia enkontru ho primeiro ministru, ha’u hateten ita haluha tia ita nia maluk peskador sira ne’e mak moris iha kosteira neba, nebe hamutuk ema rihun rua resin ne’e bela fo moris ba familia no komunidade sira iha neba.” Tenik Secretaria Estadu Peskas Elidio de Araujo
Secretario ne’e haktuir dadus peska ikan ilegal ninia pursentu bo’ot liu fali Timor Oan sira nebe halo Peska Legal.
“ Ha’u hetan dadus husi teknika sira relata mai, ita nia peskador sira kaptura ikan iha teritoria timor tomak ne’e total foin 2%, maibe, peskador sira nebe halo peska ilegal hodi kaer ita nia ikan hamutuk 20%, ida ne’e
ninia porsentu b’oot la halimar, se kalkula ba osan, ne’e metade husi orsamentu jeral estadu ne’e bele kobre husi peskas.”dehan Secretaria Estadu Peskas, Elidio de Araujo.
Iha fatin hanesan peskador Suco Suai Loro, Rui Amaral senti kontenti ho material nebe maka apoiu husi Governu ba iha peskador sira iha Suco Suai Loro, atu nune sira bele uza ba sira nia nesesidade peska loro loron nian.
“Ha’u senti kontenti tebes, tanba ha’u hanoin ami peskador iha ne’e moris fila fali ona, tan ohin Governu bele mai ajuda ami liu husi fahe material peska nian ba Grupo Peska sira iha ne’e hodi bele kontunia ami nia aktividade ne’e bele l
a’o ba oin.” Katak Peskadore Rui Amaral ba Jornalista iha Sede Suco Suai Loro Quarta (21-10-20) hafoin simu material Peska husi Sec. Estadu Peska.
Liga ho okaziaun ne’e Adj.Administrador Municipio Covalima Miguel Armada Konsidera ho apoio material peskas ne’e, populasaun iha Suco Suai Loro nebe hamotuk 90% mak moris ho vida Peskador bele hatutan sira nia moris ba aban bainrua.
Tan ne’e Armada husu atu benefisiarius sira utiliza didiak material nebe Governu fo liu husi Sec. Peskas ne’e.
“iha ne’e komunidade hotu-hotu maioria moris ho peskas, hahu husi beiala nia tempo to’o ohin loron, hakarak apela deit ba komunidade sira katak material peskas ne’ebe agora dadaun imi simu ne’e tenki utiliza didi’ak, hodi hatutan imi nia moris liu husi halo aktividade peska ninia, tan imi iha suco ida ne’e 90% moris ho aktividade peska hanesan kail ikan, nosoe rede iha tasi lara.”Armada hakutu.
Jornalista : Jose fereira/Lito Sulor
Editor :Chamor Nahac
