Covalima (RCCT) 26-12-24- Hahu husi fulan Janeiru to’o Dezembru 2024 Autoridade Protesaun Sivil (APC-Sigla Portugues) rejista komunidade vitima Dezastre iha Munisipiu Covalima hamutuk uma kain atur ida sanulu resin hitu (117) ho tipu dezastre ne’ebé lahanesan.
Komandante Autoridade Protesaun Civil (APC) Munisipiu Covalima Celestinho Afonso, hatete tipu dezastre ne’ebé akontese iha Munisipiu Covalima rezulta vitima uma kain 117 ne’e kompostu husi, Anin Furakaun ka anin bo’ot,Insendiu, Inundasaun, erosaun. Nia relata , husi total uma kain 117 ne’e iha at total uma kain-55, at naton iha uma kain-17 no iha uma kain at kaman-48.
“Husi fulan Janeiru mai to’o dezembru agora ne’e ita nia komunidade sira ne’ebé hasoru dezastre mai ho tipu dezastre anin sobu uma, ahi han uma, inundasaun, rai halai, ne’ebé iha ne’eba ho total uma kain ne’ebé hetan afetadu hamutuk 117, iha ne’eba ho nia kategoria anin sonu hamutuk uma-92, insendiu ka ahi han uma hamutuk-17, rai halai iha uma kain-4 no inundasaun hamutuk-4” deklara Komandante Autoridade Protesaun Civil (APC) Munisipiu Covalima Celestinho Afonso, ba jornalista sira iha nia k’nar fatin Santa Rosa Suai, Segunda (26/12).
Ho nune’e vitima uma kain 117 ne’e hetan ona apoiu emerjensia hanesan aihan no la’os aihan husi governu, maibe apoiu konaba material ba rekopesaun dadaun ne’e sei prosesa hela iha nasional.
“Ita ko’alia konaba apoiu emerjensia sira ne’e hetan hotu ona apoiu emerjensia liliu ba food item no non food item, konaba material rekoperasaun ne’e sei prosesa iha nasional, ne’ebé ida ne’e ita hein deit desizaun husi nasional nian, bainhira desizaun tun mai ami maka foin bele responde ba rekoperasaun nian, ita tama iha rekoperasaun sira 117 ne’e hotu maibe ninia kategoria maka la hanesan, ida at total ninia kategoria oin seluk, at naton nia tuir fali kategoria ida ne’e, ninia prosesu husi ami hato’o ona ba iha nasional husi nasional maka bele deside, ne’ebé fiar katak iha tinan 2025 nia laran ne’e bele tama to’o ona prosesu ida ne’e” nia nia informa.
Komandante Autoridade Protesaun Civil (APC) Munisipiu Covalima Celestinho Afonso husu ba komunidade tomak iha aldeia 148, suku 30, Postu Administrativu 7, katak ho klima ida ne’ebé akontese daudaun liliu udan ho volesidade maka’as, tan ne’e husu ba komunidade hotu atu ses husi fatin risku dezastre naturais sira hanesan mota ninin, ses husi ai hun bo’ot, ses husi foho hun nune’e bele Evita sai vitima ba dezastre naturais ne’ebé bele rezulta lakon vida.
Jornalista : Julio Salinas
Editor : Chamot Nahac
