Covalima (RCCT) 29-12-24-Prezidente Autoridade Munisipiu Covalima Miguel Armada Cardoso “Razão” apela ba komunidade tomak iha Aldeia 148, Suku 30, Postu Administrativu 7 atu kontribui hodi simu tinan foun 2025 ho paz no dame.
PAM Covalima foti referensia husi selebrasaun loron natal iha 25 Dezembru foin lalais ne’ebé povu Covalima Kontribui pozitivu ba situasaun dame durante ambitu natal. Nune’e mos Miguel Armada Cardoso “Razão” husu ba Fusionariu sira atu exemplu ba komunidade em Jeral liu liu ba juventude sira hodi nafatin mantein estabilidade, dame no paz iha munisipiu Covalima.
“Nudar autoridade Munispiu Covalima hakarak hato’o mensajem ba ha’u nia funsionariu tomak liliu ba ha’u nia komunidade iha munisipiu ida ne’e atu espera, atu hakmatek iha fatin ida-idak hanesan mos iha Natal foin lalais liu ona ita la hetan problema, ita la hetan asidente ruma tanba ita hotu espera, ita hotu hakamtek iha fatin ida-idak maka problema seluk la mosu mai” PAM Covalima Manifesta lia ne’e ba jornalista sira iha ambitu inagurasaun Residensia Prezidente Autoridade Munisipiu Covalima, Sabadu (28/12)
PAM Covalima tau esperansa no konfiansa nafatin ba komunidade no juventude sira atu nafatin haksolok hodi ses husi problema durante selebrasaun tinan foun 2025.
“Prezidente autoridade hakarak espera katak iha tinan foun mai ne’e ita lakohi akontese problema ruma iha komunidade nia let, labele akontese ka barullu, maske ita hakarak kontente iha fatin-fatin ne’e normal komunidade ida-idak ho nia familia atu kontente iha fatin-fatin ne’e normal maibe labele iha problema ida ne’e maka ita sujere” nia dehan.
Prezidente Autoridade Munisipiu Covalima Miguel Armada Cardoso “Razão” kontinua husu nafatin ba komunidade hotu atu kria paz no dame hodi simu tinan foun no labele hamosu problema, nia mos agradese ba povu Covalima tanba kontribui paz durante ambitu selebrasaun Natal 2024 la mosu problema nune’e nia nafatin tau konfiansa katak iha foun mai ne’e mos sei la akontese problema.
Jornalista : Julio Salinas
Editor : Chamot Nahac
