Covalima (RCCT) 29-11-24-Prezidente Autoridade Munisipiu Covalima, Miguel Armada Cardoso “Razão” lamenta ho partisipasaun Funsionariu sira nian, mihis liu iha komemorasaun loron proklamasaun Independensia ba dala 49 iha Munisipiu Covalima, ne’ebé realiza iha Kampo ladi suai.
Tan ne’e, Prezidente Autoridade Munisipiu Covalima (PAM), Xamada ba Diretór Servisu Munisipal no Diretór Delegasaun sira atu kontrola ida-idak ninia funsionariu sira. Nia mos dehan la iha razaun fundamental ida bainhira funsionariu sira la partisipa iha serimonia hasa’e Bandeira Nasional iha loron 28 Novembru.
“Ha’u nia funsionariu barak maibe la partisipa maka barak liu, toma atensaun diretór ida-idak funsionariu ida ne’ebé la marka prezensa ohin loron, ha’u sei la abalda, ba mos diretór delegasaun teritorial sira atu hare, la’os husik hela de’it, tanba ne’e PAM sei kontrola, ha’u deskontenti dader to’o lokraik ne’e, tanba sa funsionariu barak la mai,” dehan Prezidente Autoridade Munisipiu Covalima (PAM), Miguel Armada Cardoso “Razão” iha serimonia hatun bandeira ba selebrasaun 28 Novembru iha Kampu Ladi Suai (28/11).
Miguel Armada mos kestiona konaba Funsionariu Kazual hamotuk 211 iha Covalima maibe menus liu partisipa iha komemorasaun 28 Novembru ba dala 49, ne’ebé Covalima selebra serimonia hasa’e bandeira iha kampo ladi suai ne’e.
“ha’u la hare funsionariu SEFOPE, iha ka lae?, funsionariu edukasaun iha ka lae?, funsionariu seluk tan kazuais iha Covalima ema na’in-200 mais ha’u la hare, toma atensaun ba buat sira ne’e hotu, rona didiak liliu funsionariu sira, ba oin iha 20 de Maiu 2025 mai ne’e atu hanesan ne’e ha’u la simu tenke halo di’ak liu ida ne’e” Tenik PAM Covalima.
Alende Funsionariu sira nia partsipasaun mihis iha Komemorasaun Loron Prokalamasaun Independesia ne’e, Menus mos partisipasaun husi Komunidade sira husi suku lima mak Partense iha Postu Administrativu Suai ne’ebé nudar kapital ba munisipiu Covalima.
“Ba xefe suku na’in-5 hakerek iha imi nia nota, 20 de Maiu tuir mai, konsellu suku sira tama hotu iha formatura, husi suku ba to’o xefe aldeia alende komunidade, ofisial suku sira ha’u nunka hare mosu mai, se ita bo’ot sira la tau atensaun, la tau sentidu katak loron ida ne’e espesial ba ita, ema na’in atus ba atus maka mate fakar ran hodi sosa independensia ida ne’e maibe ita rasik la respeitu” tenik PAM Covalima.
Prezidente Autoridade Munisipiu Covalima, Miguel Armada Cardoso “Razão” tau esperansa povu covalima tomak, Veteranu no entidades hotu hotu atu partisipa masimu iha komemorasaun Loron Idependensia Timor Leste (20 de Maiu) iha tinan 2025
“Atu buat sira ne’e la’o didiak ita tenke iha revolusaun mental ida, mental ida ne’ebé hakarak hein deit, loron di’ak ida ba ita mos lakohi mai, tempu Indonezia pimpolda lian sai ema hotu-hotu partisipa, ba oin Xineza sira iha ne’e mos tenke partisipa hotu fatin ba sira ketak, profesora husi eskola Kafe nian mos tau ketak, ita tenke valoriza mos sira se lae buat sira ne’e la’o ladi’ak.” Nia relata.
PAM Miguel Armada Cardoso “Razão” ko’alia sai lamentasaun sira ne’e wanhira sai nudar inspetor serimonia hatun bandeira nasional ba komemorasaun loron proklamasaun independensia ba dala 49 ne’ebé Covalima realiza iha kampo ladi suai, tanba tuir ninia observasaun hahu husi dader to’o lokraik funsionariu barak liu maka la hola parte hodi partisipa iha serimonia hasa’e no serimonia hatun bandeira nasional.
Engkuantu total funsionariu iha Administrasaun Covalima hamotuk ema na’in 639, kompostu husi funsionariu permanente ema na’in 323, Ajenti hamotuk 45, Kazuais iha ema na’in 211 no funsionariu Destakamentu husi nasional mai apoiu iha servisu administrasaun munisipiu covalima hamotuk ema na’in 60.
Notisia Relevante : https://www.rcct.tl/komemora-28-novembru-fo-hanoin-ema-hotu-halo-reflesaun-ba-jornada-pasadu/
Jornalista : Julio Salinas
Editor : Chamot Nahac
