Covalima (RCCT) 21-01-25 Prezidente Autoridade Munisipiu (PAM) Covalima kria enkontru ho Diretóra Servisu Munisipal Edukasaun no Diretór eskolar sira hodi fahe informasaun konaba konsesoens eskolar ne’ebé Ministeriu Edukasaun Intrega ona kompetensia ba Autoridade Munisipal ida idak, tau ona iha planu orsamentu munisipal.
PAM Covalima Miguel Armada Cardoso “Razão” husu ba jerente eskola sira atu zere didi’ak osan ba konsesoens eskolar ho di’ak tuir mata dalan ne’ebé iha ona..
“Ha’u fiar katak ita bo’ot sira bele zere, no zere ho fuan katak ha’u nudar ema Covalima oan ha’u moris iha rai ida ne’e, ha’u zere ho di’ak, zere ho fuan hodi hein mos dezentralizasaun, kondisaun obedesaun minimu ne’ebé mak mosu mai karik Covalima bele pasa,” husu PAM Covalima Miguel Armada Cardoso “Razao”
Diretóra Servisu Munisipal Edukasaun Munisipiu Covalima Elda Fatima, Autoridade Munisipal mak sei halo kontrollu masimu no mos sei observa husi inspetor eskolar, Servisu Fiskalizasaun no mos Administrador Postu sira.
“Tinan uluk ne’e husi ministeriu edukasaun maka zere rasik mais agora husi ita nia ministeriu edukasaun intrega ona ba iha autoridade munisipiu ida idak, utilizasaun orsamentu ne’e so husi munisipiu rasik mak bele zere, entaun iha ne’eba depois sei observa husi inspetor husi fiskalizasaun husi administrador posto sira depois osan konsesoens bele uza hodi hadi’a no rehabilitasaun ki’ik sira, no sira bele uza hodi hadi’a eskola ne’ebé mak odamatan at nia janela sira” hatete Diretora Edukasaun Munisipiu Covalima Elda Fatima
Iha fatin hanesan Diretór Eskola Baziku Sentral Ogues, Antonino da Costa, rekuñese sei iha dubidas konaba ba matadalan ezekusaun osan konsesoens eskolar
“ liu husi inkontru ida ohin fo hanoin ami ba dirijente sira atu bele zere di’ak liu tan liliu ligasaun ho mata dalan ba ezekusaun konsesoens eskolar ninian tamba durante ne’e duvidas ba ami mak konaba define ba ezekusaun utilizasaun konsesoens eskolar tuir manual ne’ebé mak iha, liu liu ba iha manutensaun preparasaun ki’ik no no maior dala ruma ami atu ezekuta ami ta’uk, depois de ezekuta iha mata dalan balu ne’ebé mak la autoriza ami, maibe liu husi enkontru ida ohin ne’e ami agradese tebes tamba iha informasaun ne’eb’e deteladu ba ami atu nune’e ba iha 2025 ba oin ami zere di’ak liu” hatete Diretór EBC Ogues Antonino da Costa
Entretantu, reuniaun ne’e hala’o iha Salaun Edukasaun Munisipiu Covalima, partisipa husi PAM Covalima, Diretóra Servissu Munisipal Edukasaun, Diretor no Xefe Gabinete eskolar sira, inklui mos kordenador eskola sira ne’ebe mak partensi iha Munispiu Covalima .
Jornalista : Alfredo Barreto
Editor : Chamot Nahac
