Covalima (RCCT) 22/04/23, Prezidente Partidu Os Verdes Timor (PVT), António Lela Hunu, kompromete bainhira iha eleisaun parlamentar 2023 povu fo fiar hodi ba kaer ukun sei kria sentru formasaun ba joven sira tanba durante tinan 20 nia laran estadu ka governu ladun tau matan.
“Bainhira Os Verdes kaer ukun hau sei fo ba imi Vise da traballu uza ba serbisu rai liur hodi fo han ba imi familia sira iha rai ida ne’e, hau sei harii sentru formasaun para treinu imi, tanba imi nia kbi’it ne’e estadu maka la tau matan ba imi, partidu sira ne’ebe kaer ukun ona la tau matan ba imi hodi nune’e uza imi hanesan instrumentu ba poder” deklara Prezidente Partidu Os Verdes Timor (PVT), António Lela Hunu, ba militantes no simpatizante sira hafoin hala’o kampaña eleitoral iha Suku Suai-Loro, Postu Administrativu Suai, Munisípiu Covalima Sabadu (22/04).
Nia haklaken ba militantes no simpatizante sira katak partidu Os Verdes Timor iha vizaun rua, ida oin nusa maka sai hanesan instrumentu ida atu transforma, lori dalan ida hodi enxe membru nia kakutak, enxe membru nia kabun no enxe membru nia bolsu, ne’e instrumentu ekonomia ida ne’ebe partidu hola papel.
Partidu iha konseptu klaru, komprimisu klaru ba membru partidu Verdes, komprimisiu eleitoral ba familia Verdes iha Timor laran tomak, lisensa ba aman maromak ba rai lulik, foho lulik, tasi lulik no mos ba matebian eroi no martir sira katak povu fo fiar PVT ultrapasa bareira eleitoral ho kadeira 5 to’o 7 iha eleisaun parlamentar 2023 ida ne’e maka partidu sei utiliza orsamentu suvensaun publika hodi implementa komprimisiu sira maka hanesan tuir mai ne’e.
Primeiru harii sentru formasaun profesional empregu ba membru Verde hotu, sei serbisu hamutuk ho Verde iha mundu atu implementa programa emepregu Verdes hamutuk rihun 50 ba membru iha Timor laran tomak.
Implementa programa koperativa hamutuk-1000 ba membru iha Timor laran tomak, serbisu hamutuk global caring, Verdes mundial, sei prepra kuadru Verdes bolsa estudus hamutuk-1000 ba Verdes nia oan sira no ida ikus liu sei instala embaixadores Verdes iha nasaun 10 maka hanesan iha Australia, Nova Zealndia, Korea, Japaun, Canada, Irlanda Norte, Irlanda Republika, Englangtera, Scoadlandia ho Suizerland.
Verdes sei haruka nia oan na’in-10 sai emabaixador Verdes iha ne’eba hodi prepara trata Vise de traballu ba Verdes nia oan sira hamutuk rihun-50, ida ne’e komprimisiu verdes ba familia verdes ida ne’e maka sei atu halo ba povu bainhira hetan fiar hodi ba kaer governu.(JS)
