.png)
Covalima (Covalima) 18-03-24-Organizasaun Noun Governamentais (ONG) ba Futuru durante loron tolu nia laran hahu iha Kuarta loron 13 to’o Sexta Loron 15 Fulan marsu ne’e, kapasita formasaun ba foinsa’e iha Munisipiu Covalima konaba prevensaun violensia kontra feto, no labarik feto.
Jestor ba Hari Dame ONG ba Futuru Vidal Campos hatete objetivu husi formasaun durante loron tolu ne’e atu hasa’e koñesimentu ba foinsa’e sira liliu ba xefe juventude sira bainhira hodi bele kontinua hatutan formasaun konaba prevensaun violensia kontra feto, no labarik feto iha komunidade nia let.
“formasaun ne’e ho nia topiku maka hakerek hela iha kotuk ne’e haree liu ba iha prevensaun violensia kontra feto foinsae no labarik feto no ami uza matadalan ida ho naran lian kontra violensia, objetivu husi formasaun durante loron tolu ne’e maka atu hasae kapasidade ka aumenta konesimentu ba ita nia partisipante liliu ba ita nia estudante sira, profesora sira, husi ita nia xefe juventude sira no ita nia reprejentante komunidade sira inklui ita grupu FOKADIMA husi Igreja ne’ebé sira mos mai partisipa iha formasaun ne’e atu sira bele kontinua fahe fila fali formasaun ne’ebé sira aprende dirante loron tolu ligadu ho nia topiku ne’ebé iha, hanesan materia sira ne’ebé durante loron tolu nia laran sira aprende komesa husi igualdade jeneru no ami koalia uitoan kona ba violensia kontra feto no labarik feto, koalia kona ba violensia sexual, violensia domestika, asediu sexual, kaben sedu no seluk” informa Jestor ba Harii Dame ONG ba Futuru Vidal Campus ba jornalista sira hafoin remata formasaun ba foinsae sira iha Covalima ne’ebé hala’o iha Sede Suku Debos, Postu Administrativu Suai.
Xefe Juventude Suku Kamanasa, Marcos Taran, hateten sei hatutan informasaun ne’ebé hetan iha Formasaun ne’e ba Juventude sira iha nia suku laran.
“Husi ONG ba Futuru ne’ebé maka fo ona treinamentu ka formasaun mai ami durante loron tolu nia laran husi hau rasik sente orgullu tebes, agradese no obrigado wain tebes ba sira tanba ba hau hanesan mbuat foun ida ne’ebé hau foin aprende liu husi treinamentu ida ne’e, hau mos iha hanoin ida katak agora daudaun nudar xefe juventude Suku Kamanasa formasaun ne’ebé hau tuir hakarak ba aplika fali iha hau nia suku no aldeia” nia dehan.
Formasaun ida ne’e ONG ba Futuru realiza tanba hetan apoiu fundus husi KOICA liu husi Ajensia Internasional UN WOMEN iha Timor-Leste, no formasuan hanesan ONG BELUN hala’o uluk ona iha Munisipiu Dili, Baukau, Oekusi no ikus iha Covalima,
Entretantu, partisipa iha formasaun ne’e mai husi xefe juventudu feto no mane husi Suku Kamanasa, Suku Suai-Loro, Suku Debos, reprezentante komunidade husi Suku Matai, estudante husi Eskola Sekundaria Jereal Publiku Suai, engkuantu formasaun ne’e hala’o iha Salaun enkontru Sede Suku Debos.
Jornalista : Julio Salinas
Editor : Chamot Nahac
