Covalima-RCCT- Provedoria dos Direitos Humanos ( PDHJ ) liu husi Oficial Fiskalizador halo vijita ba Fronteira Salele Tiloma’ar, Covalima, hodi observa servisu sira iha Linha Fronteira kona ba ema tama no sai liu husi odamatan Rai k’ladik Salele no mos observa aktividade merkaduria importasaun sasan husi Indonesia mai Timor Leste.
Ofisial Fiskalizador Provedoria dos Direitos Humanos Justica (PDHJ) Carvalinho dos Santos Cardoso iha nia intervista informa, PDHJ mai halo observasaun ida ne’e konaba servisu nasaun 2 (RDTL-RI) nian iha Linha Fronteira Salele, Tiloma’ar.
Tan ne’e Ofisial Fiskalizador ne’e hatete bazeia ba observasaun ne’e hatudu katak atenmentu servisu Seguransa no Saude sira hala’o di’ak tebes hodi atenden ba movimento ema tama sai husi liu husi Fronteira Salele. Dehan Ofisial Fiskalizador Provedoria dos Direitos Humanos Justica (PDHJ) Carvalinho dos Santos Cardoso Sexta Feira (16-10-20) iha Porta Entrada Posto Integrado Salele, Tiloma’ar.
“Tuir observasaun husi PDHJ nian ba loron ida ohin konaba movimentu ema tama sai ne’e, ita hare di’ak tebe-tebes, koperasaun entre parte Autoridade hanesan Saude, Polisia la’o kapas tebe-tebes,”
Carvaliho mos dehan,bazeia observasaun ne’e sira nota katak servisu atementu husi parte saude liga ba Prevensaun Covid-19 ba sidadaun sira nebe tama mai Timor leste mos la’o diak no tuir kriteira sira nebe mak nasaun ne’e iha ona.
“Liliu kona ba oinsa mak atu atende halo prevensaun Covid-19, ba ita nia sidadaun sira nebe maka tama husi nasaun vizinhu, Indonesia, ita hare katak buat hotu la’o kapas e di’ak tebes-tebes iha fronteira ne’e ”Dehan Carvalinho dos Santos Cardoso iha Fronteira Salele.
Tan ne’e mak Carvalinho dos Santos nafatin husu ba aturoridade hanesan Ministerio Saude no Seguransa atu manteim nafatin servisu ho koperasaun di’ak iha linha Fronteira, atu nune’e bele prevene moras Covid-19 labele tama mai Nasaun Tirmor-Leste.
“ Ha’u nia hanoin presiza nafatin servisu kordenasaun entre parte relevante 2 ne’e, atu nune’e moras ne’e labele hadaet mai Timor, liu-liu ba ita nia sidadaun nebe tama sai ilegalmente di’ak liu prevene aan hodi labele tama sai ilegal,nune’e labele lori moras ne’e tama mai ita nia rain”Tenik Carvalinho.
Nune’e mos Carvaliho dehan atu autoridade sira iha Linha Fronteira mantein nafatin disiplina iha koperasaun servisu ne’e, hodi halo prevensaun Covid-19 atu Rai Doben Timor Leste labele hetan da’et Covid-19, tanba situasaun ba moras ida ne’e lahetene to’o bainhira mak atu remata. Carvalinho haktenik.
“Husu mos nafatin ba parte autoridade hanesan saude, seguransa atu koko mantein nafatin disiplina servisu, iha koperasaun nafatin atu nune’e, prevene moras labele tama mai iha ita nia rain, ita la hatene moras ne’e bainhira atu remata ” Haktuir Carvalinho dos Santos Cardoso.
Nune’e mos Oficial Fiskalizador Provedoria dos Direitos Humanos ne’e esplika, Bainhira atu vizita ba Nasaun ida, tenke iha kriteira ida konaba livre husi Covid 19 atu nune’e labele iha failansu bainhira halo vizitasaun ba pais ida nebe ita hakarak ba.
Jornalista : Janu Barros & Ansa Nunes
Editor : Chamot Nahac
