Covalima (RCCT) 15-11-23—Servisu Saude Munisipiu Covalima hahu husi fulan Jullu to’o Outobru tinan ne’e rejista kazu malaria importadu hamutuk sia (9).
Diretóra Servisu Munisipal Saude Covalima, Maria de Fatima Moniz, hatete kazu malaria importadu 9 ne’e rejista iha Postu Administrativu Tilomar, Suku Lalawa, Aldeia Ai-Oan no Suku Beiseuk.
“Ita rejista kazu malaria hamutuk 9, kazu ne’ebé ita rejista primeiru iha 27 de Jullu ida ne’e sistomas ne’ebé maka mosu iha pasiente, depois sente labele nia mai konsulta foin maka ami nia pesoal halo analista ba nia hodi hetan rezultadu, iha loron 31 Jullu 2023 ne’e kazu primeiru mosu, husi ida ne’e deteta tan kazu 3 iha fulan Augusto nia laran, depois tama fali ba fulan setembru kontinua rejista kazu malaria no foin lalais liha fulan Outobru ita rejista tan, tanba ne’e hamutuk total ema na’in-9 maka kazu malaria important ne’e, maioria kazu hirak ne’e rejista husi Postu Tilomar, iha Suku Lalawa, Aldeia Ai-Oan no Suku Beiseuk iha parte Wetaba” informa Diretóra Serbisu Munisipal Saude Covalima Maria de Fatima Moniz, ba jornalista sira iha nia kna’ar fatin Saude Covalima Kuarta ne’e.
Diretóra ne’e afirma hafoin deteta kazu hikas fali malaria iha Covalima, Servisu Saude Munisipal halo kedas intervensaun liu husi rega komunidade sira nia uma iha área afetadu partikulamente iha Postu Administrativu Tilomar, Suku Lalawa no Beiseuk.
“Bainhira deteta hetan parte saude halo kedas tratamentu ba pasienta, tratamentu hotu ami iha hanoin oinsa atu bele halo prevensaun para fektor ka susuk ne’ebé moris iha ne’eba labele hadaet ba ema seluk, signifika iha loron rua nia laran sira ba halo intervista ba iha pasiente, depois loron 5 nia laran halo screening, hasai ran halo tes massal ba iha area afetadu hahu husi pasiente nia uma ba to’o kilo mentru ida ho balun, depois iha loron 10 fila fali halo prevensaun liu husi Rega susuk” nia esplika.
Diretóra Maria de Fatima Moniz, dehan kazu Malaria ne’e akontese tanba komunidade hela iha liña fronteira maioria sei iha relasaun familia ho maluk sira ne’ebé hela iha Malaka no Atambua NTT Indonesia, tan ne’e bainhira iha lia metan ka lia mutin ruma sira sempre vizita malu hodi hamosu kazu malaria importadu 9 iha Covalima.
“Husi intervensaun ne’ebe maka ita halo ba iha kazu primeiru, segundu to’o mai iha ne’e signifika katak sei iha ligasaun tanba sira halo viazen ba iha mota sorin ka Indonezia, iha informasaun mos katak iha momentu ne’eba familia balu mate iha Tilomar halo familia sira husi Indonezia ema besik na’in 20 resin mai hela iha area ne’eba durante semana ida, tanba ne’e ita bele dehan katak moras ne’e importadu” nia afirma.
Entertantu Diretóra Servisu Munisipal Saude Covalima, Maria de Fatima Moniz, husu ba komunidade hotu, ida idak, tenki iha responsabilidade hodi halo prevensaun ba moras malaria, tanba moras malaria ne’e inkuravel bainhira kuandu kona ona susar atu sai.
Jornalista : Julio Salinas
Editor : Chamot Nahac
