Covalima (RCCT) 02-12-24-Ministra Solidaridade Sosial no Inkluzaun (MSSI) Veronica das Dores, apoiu nesesidade baziku ba familia vulneravel hamutuk na’in-219 iha Suku Matai, Postu Administrativu Maukatar, Munisipiu Covalima.
Governante ne’e hatete hala’os asaun karidade hodi apoiu fo ba familia vulneravel ne’e hanesan atividade ida husi MSSI hodi komemora loron proklamasaun Independensia Timor Leste ba dala 49 ne’ebe foin liu dadauk. Membru Governu da Sia ne’e mos afirma Atividade hanesan la’os foin maka akontese iha Suku Matai, Munisipiu Covalima maibe antes ne’e hala’o ona iha munisipiu sira seluk,
“Kuaze hala’o iha fatin barak ona, foin lalais fulan kotuk ami iha Oecusse no ohin mai iha Covalima, tanba ita hare katak familia sira vulneravel ne’ebé identifika husi xefe aldeia no xefe suku, depois diretór distrital, sira identifika katak maluk sira ne’e presija atu hetan apoiu ai-han, objetivu ida seluk maka ita foin lalais komemora hela 49 anos, 28 Novembru no ita hateke 30 de Agusto ita selebra 25 anos referendum entaun iha loron importante sira ne’e tuir loloos ami hakarak atu distribui ba iha fatin hotu-hotu maibe infelismente labele tanba ekipa maka lato’o, tan ne’e maka ami distribui ba uluk iha munsipiu sira hanesan Munisipiu Ermera, iha Oecusse no agora daudaun iha Suai no sei kontinua ditribui ba munisipiu barak ne’ebé sei hein hela maske distrinui tinan ne’e la hotu, tinan oin bele halo hotu” informa Ministra Solidaridade Sosial no Inkluzaun (MSSI) Veronica das Dores, ba jornalista sira hafoin hala’o distribui ai-han ba familia vuneral sira iha Suku Matai, Segunda (02/12).
Xefe Suku Matai Nuno José M. Pereirra sei esforsu nafatin hodi buka apoiu husi entidades revante sira nune’e bele fo apoiu ba familia vulnevarel sira iha Suku Matai.
“Ami hanesan lideransan komunitaria ho konsellu tomak sei toma responsabilidade nafatin ba inan-aman sira komunidade Suku Matai ida ne’e para oinsa ita hotu bele hetan netik ai han, ne’ebé apoiu ida ne’e atu hodi tulun ita para aguenta, oinsa atu sustenta netik ita para hodi aumenta ba loron ida ka rua nian, ami sei esforsu nafatin liliu ba alin difisiente sira, ka familia difisiente sira naran seidauk laiha no familia vuneravel sira ne’ebé naran seidauk laiha katak sei iha kontinuasaun ita sei nafatin buka dalan atu hotu bele hetan apoiu ida ne’e” nia dehan.
“Governu liu husi MSSI fo apoiu ba familia vuneravel sira ne’e atu bele sustenta moris ba tempu badak, Familia Hamotuk 219 iha suku Matai ne’ebé hetan Apoiu Aihan Baziku mak hanesan, foos saku ida, buiskuit kalen ida, koto kilo, fore mungu, susu enak no seluk tan. Partisipa iha distribuisaun ne’e maka Sekretariu Munisipiu Trata Asuntu Sosiais no Organizasaun Komunitaria, Filomeno Cardosos, Administrador Postu Administrativu Maukatar, Laurentino de Jesus, Segundu Komandante PNTL Munisipiu Covalima Inacio Amaral, inklui xefe suku no konsellu suku sira no mos komunidade sira.
Jornalista : Julio Salinas
Editor : Chamot Nahac
