Covalima (RCCT)- 13-01-21- Movimentu Feto Foin Sa’e Timor Leste ( MOFFE TL ) fo apoiu material agricultur ba grupo feto sira iha Municipio Covalima hodi hala’o sira nia aktividade agrikultur iha sira nia grupo laran.
Ba Jornalista RCCT Diretora MOFFE-TL Yasinta Lusina hateten MOFFE-TL so iha kbit hodi fo apio ba grupo feto nebe MOFFE-TL forma ona durante iha Municipio Covalima.
“lolos ne’e hakarak atu tulun ema hotu hotu ,maibe ami nia k’bit lato’o hodi bele suporta, agora dadaun ami bele fo ajuda grupu 4 deit, grupu 4 nee mak grupu sira nebe ami stabelese iha tinan 2017.” Dehan Diretora MOFFE-TL Yasinta Lusina ba RCCT iha Salaun Administrasaun Covalima tersa feira (12-01-21) hadoin rematan distribui ajuda material ba grupo Agrikultores Feto Covalima sira.
Diretora ne’e Fundamenta depois de estabelese Grupo hira ne’e, iha difikuldade nebe sira infrenta mak material utilizasaun ba produsuan aihan, tan ne’e MOFFE-TL iha hanoin hodi fo Apoio fasilidades hirak nebe hodi bele ajuda grupo hirak ne’e atu bele lao ho diak.
“iha difikuldade balu nebe mak sira infrenta hodi bele kontinua servisu halo produs ai-han, tamba ne’e ita kontinua suporta sira ho fasidade sira ne’e atu nune’e sira bele hala’o produsaun ho di’ak liu tan”Tenik Diretora MOFFE-TL .
Nia Akresenta MOFFE-TL hakarak mos atu fo tulun ba grupo Agrikultur feto sira seluk iha Posto Administrativu hotu, maibe sei hare uluk lai ba grupo 4 nebe mak antes ne’e estabelese ona hahu iha 2017 liuba nebe mak durante ne’e hala’o ona hela atividades agricultur nian iha Municipio ida ne’e. Nia (Diretora MOFFE-TL mos dehan material agricultur hirak nebe mak fo ona ba grupo sira ne’e hodi utilija ba atividade iha sira nia grupo laran.
“Hakarak mos atu tulun inan feton sira iha postu seluk, mas agora dadaun ita bele apoiu uluk ba grupo ha’at nebe hala’o aktividade agrikultura, esperansa boot ba inan feton sira ohin loron reprezenta ona grupo haat nebe mak simu ona material sira ne’e ita espera katak sira bele utiliza material sira ne’e ho diak” Katak Yasinta.
Iha fatin hanesan xefe grupo ai-kamelin Amelia de Jesus Amaral senti orgulho ho apoiu nebe mak sira hetan husi MOFFE-TL, tamba tinan barak ona mak sira nia grupo hasoru difikuldade ba material agricultur hodi halo produsaun iha sira nia grupo laran
“ Hau nu’udar Xefi Grupu Ai-kameli ha’u senti orgulho tebes tamba ho oportunidade ida ne’e maski ami hari grupo liu husi MOFFE–TL, ami iha difilkuldade barak konaba oin atu hasa’e produsaun lokal iha ami nia grupo ida-idak, durante tinan barak ami dehan dezafiu nebe ami hasoru, oinsa atu halo produsaun barak, nebe ho Moffe nia prezensa hodi halo asesmentu ba ami nia grupo laran nebe ohin loron ami hetan ona material sira ne’e” Katak Amelia ba RCCT Tersa Feira (12-01-21) iha salaun Administrasaun Covalima hafoin rematan simu ajuda material suporta agrikultura husi MOFFE-TL.
Tuir Observasaun Radio Cova Taroman, material Suporta Servisu agricultur nebe fo apoiu husi MOFFE-TL ba agricultura feto sira iha Covalima ne’e mak hanesan Sanio, hand traktor, lona , ensada, Kanuru , Magueira no seluk seluk tan.
Jornalista : AJe Ferreira & Asato Soares
Editor : Chamot Nahac
