Country Manager Timor Resource, Filomino Andrade informa, durante tinan 7 nia laran Timor Resource ho Timor Gap halo explorasaun mina rai maran no fo servisu ba Covalima oan ho Manufahi hamutuk ema na’in 800.

“Ami laran haksolok tebes tanba ohin ita hasoru malu dala ida tan, ho ida ne’e iha tinan 7 Nia laran Timor Resource ho Timor Gap hamutuk ho ita bo’ot sira hala’o k’nar explorasaun mina rai maran iha Suai, iha prosesu ida ne’e ami bele hato’o katak emprega ema besik na’in 800 iha Munisipiu Covalima ho Manufahi hodi halo perfurasaun, iha perfurasaun nian ne’e maka hetan rezultadu husi mina matan tolu ne’e iha mina Matan rua ita hetan mina no mina matan ida seluk hetan mina ho gas, ida ne’e investimentu bo’ot ida to’o agora ita gasta besik millaun 75 ba perfurasaun” informa Country Manager Timor Resources, Filomino Andrade iha nia diskursu hafoin hala’o enkontru ho autoridade no Komunidade sira iha Covalima ne’ebe realiza iha salaun enkontru Feto 5, Suai, Tersa (11/06).

Country Manager Timor Resource Filomino Andrade haktuir rezultadu husi mina matan tolu ne’e di’ak, maibe iha okos liu fatuk barak hodi subar mina, tan ne’e Timor Resource sei esforu atu hasai fatuk sira ne’e, tanba husi mina matan tolu rezultadu di’ak maka bele benefisiu ba Timor-Leste hodi hadi’a dezenvolvimentu iha rai laran.

“Oras ne’e daudaun Timor Resource ho Timor Gap nia esforu oinsa bele hare rezultadu sira ne’ebé hato’o mai katak ita iha mina ba posu sira ne’ebé ita hala’o perfurasaun, goelojia sira balu iha bele konfirma katak ita hatene iha mina, maibe mina ne’e iha okos klean liu fatuk barak maka toos tebes hodi subar mina, ida ne’e maka oras ne’e daudaun Timor Resource ho Timor Gap esforsu oinsa atu bele hasai mina ne’e, karik mina ne’e ho rezultadu diak bele fo benefisiu ba Timor oan tomak, benefisiu ba governu atu bele hadi’a fali ita nia eskola, ospital no atividade sira seluk” nia dehan.

Durante iha tinan hirak nia laran Timor Resource ho Timor Gap nia komprimisiu La’os deit iha explorasaun mina maibe partisipa iha atividade barak ne’ebé hala’o iha Munisipiu Covalima ho razaun ida ne’e maka parseiru diak Liu Timor Resource ho Timor Gap iha ne’e sei kontinua nafatin.

Jornalista : Julio Salinas

Editor       : Chamot Nahac