Covalima (RCCT) 21-12-24-Ministeriu Edukasaun (ME) hatun ona orientasaun ba Eskola Sekundaria Jeral Publiku (ESGP-Sigla Portuguesa) Suai iha Munisipiu Covalima atu simu deit estudante foun ba anu letivu 2025 hamotuk ema na’in 540.
Reprezenta Diretóra SevisNotiu Munisipal Edukasaun Covalima, Francisco Barreto do Nascimento informa lia ne wainhira partisipa iha serimonia graduasaun ba estudante finalista husi Eskola Ensino Sekundaria Tekniku Vokasional Cristal Suai, iha salaun administrasaun Munisioiu Covalima, Sabado (21/12). Nia afirma katak despaxu ne’e hatun direita husi Ministra Edukasaun Dulce de Jesus Soares.
“Tuir despaxu ne’ebé Ministra Edukasaun haruka mai fo limitasaun ba Eskola Sekundaria Jeral Publiku Suai atu simu deit ema-540, labele liu husi numeru ida ne’e, liu husi ida ne’e eskola lasimu ona, inan no aman sira labele ba halo protesta, hanoin deit atu halo ekilibre ba eskola sira seluk, ita iha eskola sira seluk aleinde eskola ida ne’e, ne’e mak hanesan iha Zumalai ne’e mos eskola sekundaria jeral, Fohorem no iha Tilomar ida ne’e paralela husi ESGP Suai nian” dehan Reprezenta Diretóra Edukasaun Munisipiu Covalima, Francisco Barreto do Nascimento.
Nia mos relata konaba governu iha planu sei estabelese tan klase paralela ida iha Postu Administrativu Fatumea, ho razaun atu hakbesik Edukasaun ba iha komunidade nia let.
“Governu liu liu husi Ministeriu Edukasaun iha hanoin ida mos atu loke tan klasse paralela ida iha Postu Administrativu Fatumea, nune’e estudante sira ne’ebé akaba husi postu administrativu hirak ne’ebé ita temi, diak liu imi hanoin atu kontinua estudu iha eskola ne’ebé estabelese ona, ida ne’e hanesan fo hanoin deit tanba eskola sentral dook husi ita bo’ot sira nia hela fatin” nia informa.
Eskola Sekundaria Jeral Publiku Suai, kumpri deit despaxu husi Ministra Edukasaun atu simu deit estudante foun ba anu letivu 2025 hamotuk ema na’in-540. Nune’e Servisu Edukasaun Covalima Nafatin husu ba Inan Aman Estudante sira atu bele Haruka sira nia on aba rejistu hodi kontinua iha eskola sekundaria seluk ne’ebé ejiste ona iha munisipiu covalima.
Jornalista : Julio Salinas
Editor : Chamot Nahac
