Covalima (RCCT) 10-02-25- Xefe Suku Suai-Loro, Manuel Gomes da Costa (MAUBERE) kestiona maka’as konaba kondisaun uma ne’ebé la merese duni ka la dignu atu Unidade Polisia Maritima (UPM) sira hela fo seguransa ba povu no rikusoin tasi nian iha Suai Loro.
Veteranu MAUBERE Atual Xefe Suku Suai Loro, husu ba Governu atu tau matan hodi kria kondiasaun ka fatin ne’ebé dignu ba UPM hodi hala’o k’nar iha Munisipiu Covalima, Partikulamente iha Suku Suai Loro.
“Hau hare kondisaun uma sira hela ba de’it mos la dignu, tanba iha ne’eba uma ida uluk atan ami maka taka para halo fatin “usaha” fa’an ikan iha ne’eba, mas pelu kontrariu ikus mai UPM maka mai uza, laiha buat ida tanba ne’e fo seguransa ba ami, seguransa ba ita nia rain, so ke estadu ka governu bele mai tau matan hare direita sira nia kondisaun hela fatin ne’e dignu ka lae, no ha’u sente fatin ida ne’ebe UPM sira hela hodi hari halo sira nia postu ne’e la pas tanba fatin ne’e malorek liu, loloos ne’e sira hela fatin ida ne’ebé helik no labele hela iha malorek hanesan komunidade liu ba mai husi deit sira nia sorin” informa Xefe Suku Suai-Loro, Manuel Gomes da Costa (MAUBERE).
Xefe Suku Suai-Loro haktuir bazei ba nia observasaun katak durante UPM sira mak destaka iha Tasi Suai Loro, sei menus ekipamentu atu hodi fasilita halo kontrullu iha tasi laran.
“Ita moe, kuandu forma buat ida tenke aumenta ho nia ekipamentu, kilat sira iha, maibe nudar Unidade Polisia Maritima, barku ida laiha ba sira atu patrolia, dala ruma sira uza fali komunidade nia bero, Governu tenke hanoin no sukat ida ne’e, ita hakarak sira tenki iha ekipamentu hanesan barku ka fiber, bele fasilita sira iha prosesu kontrola iha tasi laran,” Tenik MAUBERE.
Veteranu MAUBERE, Atual Xefe Suku Suai Loro hato’o lametansaun nudar lideransan komunitariu no sidadaun ida ne’e nakonu ho Espiritu nasionalizmu no parteotizmu hodi husi ba governu atu tau mak no fo atensaun masimu bele kria kondisaun dignu ba Unidade Polisia Maritima destakada iha Covalima, Partikulamente iha Tasi Ibun Suku Suai Loro.
Jornalista : Julio Salinas
Editor : Chamot Nahac
