.png)
Covalima (RCCT) -08-03-24-Ministru Agrikultura Pekuaria Peska no Floresta, Marcos da Cruz, ne’ebé akompaña husi Sekretariu Estadu Peska Domingos da Conceição dos Santos, Sekretariu Estadu Floresta Fernandinho Vieira no Sekretaria Estadu Dezenvolvimentu Lokal (SEDL) Mateus dos Santos Talo, entrega trator unidade 4 ho marka Kubota no Ró Viber unidade 6 ba Prezidente Autoridade Munisipiu Covalima (PAM), Miguel Armada Cadoso, hafoin governante na’in 4 ne’e akompaña fali PAM Covalima entrega fali ekipamentu Ró Viber ba grupu peska sira.
Iha intervensaun Ministru Agrikultura Pekuaria Peska no Floresta, Marcos da Cruz, hatete agrikultura hanesan setor ida ne’ebé importante ba vida nasaun nian, governu iha politika atu halo produsaun ai han ne’ebe barak no kualidade.
“Setor agrikultura ne’e setor ida ita bolu dehan vida nasaun nian, se laiha aihan ema labele moris, ema presija han etu, han na’an, han ikan no modo ita la han buat seluk, han maka baut sira ne’e no buat sira ne’e produs husi agrikultor, peskador, haki’ak na’in animais ne’e maka ohin loron ita ko’alia kona ba buat sira ne’e oin nusa maka ita bele produs barak, governu ninia mehi maka oin nusa maka ita produs barak ho kualidade aihan ne’ebé di’ak nutritivu povu bele asesu no sustentavel katak ita labele produs de’it iha epoka ida, epoka seluk ne’e ita la produs ona no ita nia produsaun ne’e ema tenke asesu katak nia folin tenke menus hodi ema hotu bele sosa no tenke iha nutrisaun di’ak, aihan ne’e tenke iha kualidade. ida ne’e sai papel importante ba Ministeriu Agrikultura Pekuaria Peska no Floresta, buat sira ne’e hotu atu la’o, atu akontese ne’e so ita bele servisu hamutuk husi leten tun to’o kraik, to’o iha agrikultor sira, ne’e maka ohin ita bo’ot sira hare katak iha tempu uluk ministeriu agrikultura ita fo trator karik ita fo ba iha grupu sira, ita ba direitamente fo ba grupu maibe ohin ita bo’ot sira bele fo testamuña, hare katak ha’u entrega ba Prezidente Autoridade, prezidente fo tutan ba Diretór agrikultura, ne’e atu hatudu de’it ba ita bo’ot sira no ita hotu katak mekanismu servisu ne’e maka ida ne’e, la’os husi Dili mai to’o kedas iha natar laran maibe sistema ita tenke buka oin nusa maka iha kordenasaun servisu ne’ebé di’ak iha organizasaun ka sistema ida ne’ebé di’ak ne’e maka ita mai entrega trator para PAM ho ninia komponente sira hanesan Diretór munisipal agrikultura sira maka kontrola, sira maka operasionaliza atu ba fila rai iha ne’ebé, atu ba ko’a ema nia natar iha ne’ebé, peskador ida ne’ebé atu simu Ró ne’e sira maka hatene” informa Ministru Agrikultura Pekuaria Peska no Floresta, Marcos da Cruz iha nia diskursu hafoin entrega trator unidade 4 ho marka Kubota no Ró Viber unidade 6 ba Prezidente Autoridade Munisipiu Covalima ne’ebé hala’o iha edifisiu Agrikultura Munisipiu Covalima Sesta (08/03).
Prezidente Autoridade Munisipiu Covalima, Miguel Armada Cadoso, agradese ba Ministeriu Agrikultura Pekuaria Peska no Floresta entrega trator unidade 4 ho marka Kubota no Ró Viber unidade 6 mai PAM Covalima ne’e sai hanesan responsabilidade ida hodi halo jestaun no jere hamutuk ho Diretór servisu munisipal agrikultura halo servisu di’ak liu tan.
“Ho ró 6 ne’ebé maka ohin atan ha’u simu ona nia save ho sira seluk tan hanesan responsabilidade ida hodi halo jestaun ka jere hamutuk ho ha’u nia Diretór servisu munisipal agrikutura, nune’e mos ohin ita simu ona trator kubota unidade 4 ne’e ita agradese wa’in tanba iha kopera servisu ne’ebé di’ak, no sua exelensia nia sentidu ba Covalima aas, tanba ne’e ita bele hetan, ho ida ne’e antes ha’u hamrik iha fatin ida ne’e ohin traballu de kasa barak maka tau iha ha’u nia kabas, todan ida ne’ebé Diretór servisu munisipal agrikultura aprezenta ona mai iha ha’u nia kabas atu bele hare hamutuk kestaun ka ita nia preokupasaun ho buat seluk ne’ebé seidauk resolve ita bele resolve hamutuk, servisu agrikultura nian iha buat balu maka servisu direita ho PAM, iha buat balu maka tenke indireita ka servisu delegasaun teritorial nian ne’ebé direita ho nasional maibe la signifika katak PAM atu husik hela hanesan ne’e lae, maibe PAM mos iha dever tomak iha obrigatoriu atu halo kontrola servisu hirak ne’ebé maka fo ona liu husi servisu delegasaun teritorial hanesan peskas no mos iha floresta, servisu rua ne’e mos la husik hela PAM nafatin iha kontrola kolabora servisu ne’ebé di’ak, servisu seluk ha’u fiar katak fo ona Diretór servisu munisipal agrikultura atu jere tuir lei ne’ebé defini ona iha lei No.03/2016 iha kintu alterasaun agora daudaun mosu ona iha dekretu lei 84 nian ida ne’e maka define ita hotu sei la ses husi ida ne’e ita tenke ezekuta servisu tuir regra ne’ebé gia ita” Dehan Prezidente Autoridade Munisipiu Covalima, Miguel Armada Cadoso.
Entertantu, Politika governu nian liu husi Ministeriu Agrikultura Pekuaria Peska no Floresta (MAPPF) konaba fahe ekipamentu iha mos regra ne’ebé kesi grupu agrikultor sira atu halo jestaun no utilizasaun iha terenu bainhira komunidade sira utliza makina hirak ne’e. Trator no ro viber ne’ebe intrega grupu agrikutor sira ne’e nudar patrimonia estadu tanba ne’e tenke tau matan no kuidadu ho di’ak wainhira utiliza no mos benefisiariu sira labele pinta ro refere ho kor seluk,
Jornalista : Julio Salinas
Editor : Chamot Nahac
