Covalima (RCCT) 06-01-25-Reprezenta Diretóra Servisu Munisipal Edukasaun Munisipiu Covalima, Florindo do Carmo, husu ba manorin na’in sira iha ESGP Suai, atu labele halo diskriminasaun ba estudante iha eskola.
Florindo do Carmo dehan lia ne’e ho razaun atu garantia kualidade prosesu aprendisajem iha eskola bele la’o di’ak liu iha eskola sekundaria Jeral Publiku Suai (ESGP-Sigla Portuguesa.
“Husu mos ba profesor sira hotu hodi edukasaun Munisipiu Covalima nia fatin, labele tau diskriminasaun ba ita nia oan sira, mai iha ne’e laiha oan, laiha bei oan, laiha subriñu, maibe ema hotu-hotu alunus sekundariu jeral atu nune’e ita hare hanesan labele dehan ida ne’eba at, ida ne’e mai di’ak” informa Florindo do Carmo,dehan lia ne’e hafoin reprezenta Diretóra Servisu Munisipal Edukasaun Munisipiu Covalima, fo palestra ba estudante foun sira ne’ebé tuir orientasaun iha ESGP Suai (06/01)
Florindo mos dehan Ministeriu Edukasaun liu husi servisu munisipal edukasaun fo fiar ba Diretór eskola atu servisu hamotuk ho manorin na’in sira hodi garantia kualidade edukasaun iha eskola ida idak mak ejiste iha munisipiu covalima.
“Ita kuandu atu garantia kualidade edukasaun Munisipiu Covalima, ita hotu esforsu, ami edukasaun hare eskola barak, eskola tekniku vokasional iha tolu no sekundariu jeral iha lima, hamutuk eskola 8 iha Covalima no lakleur tan sei mosu tan iha iha Postu Administrativu Fatumea, ne’ebé ami husi edukasaun fo fiar ba diretór ho profesor sira atu garantia kualidade edukasaun iha eskola ida-idak” nia informa.
Entretantu Eskola Sekundaria iha Munisipiu Covalima hamotuk ualu (8) ne’ebé kompsotu husi ensino Sekudaria tekniku vokasional 3 no ensinu sekundaria jeral iha 5.
Jornalista : Julio Salinas
Editor : Chamot Nahac
