Falta ba fasilidade eskola no kondisaun eskola nebe a’at difikulta prosesu aprendisagen iha Eskola Baziku Filial (EBF) Lawakou Suco Dato Tolu Postu Administrativo Fohorem Municipio Covalima.
Profesor Justino Hale hato’o perkupasaun ne’e ba Radio Cova Taroman Sabado foin lalais (08/08/2020) iha Lawakou Suco Dato Tolu.
Profesor ne’e realsa liga ho kondisoins eskola nebe uja deit piku ka bebak nebe konstrui liu husi projetu pakote refrendum iha tinan hirak liu ba no dadaun piku ka bebak dodok hotu ona inklui airin mos tohar hotu ona.
“Difikuldade ne’e barak difikuldade hanesan ami komesa husi didin tamba ami hare
Kondisaun uma Eskola nian ne’e agora didin komesa lahuk hotu ona, no mos airin sira balu tohar ona” Dehan Mestri Hale.
Profesores Hale fundamenta aleinde kondisaun uma eskola ho sala neen nebe hahu dodok ne’e iha problema seluk mak menus ba fasilidade hanesan kadeira no meja inklui ho kuadru nebe profesores uja hodi hanorin.
Hatan ba perkupasaun ne’e diretur Edukasaun Municipio Covalima Edmundus Ferfeira rekuinese problema kona ba eskola nebe aat laos deit iha EBF lawakou maibe iha eskola lubuk iha covalima nebe ninia kondisaun aat.Tan ne’e Edukasaun Municipio Covalima iha ona planu atu Konstrui eskola sira nebe aat maibe depende ba Aprovasaun Orsamentu husi Governo.
Edmunudus mos dehan Problema ne’e akontese tanba Timor Leste hasoru krizi politika hodi rejulta orsamento la pasa iha parlemento nasional tan ne’e mak difikulta ba programa konstrusaun eskola.
“kona ba Eskola aat la’os iha fatin ida ne’e deit maibe iha Municipio Covalima Eskola lubuk ida mak aa, planu ba konstrui Eskola sira ne iha hotu ona maibe tanba orsamentu la aprova iha Parlamentu. Maibe ami planea ona katak husi 2020 to’o 2023 la iha Eskola ida mak sei aat iha Municipio Covalima ne’e planu maibe tanba durante ita la’o ho orsamentu duodesimu mak buat hotu la kontese tuir ita nia hakarak. Dehan Edmundus tersa feira ne’e (11/08.20) iha nian Knar fatin Edifisio Edukasaun Covalima.
Jornalista : Janu Barros/Jhony
Editor : Chamot Nahac
