Covalima(RCCT) 26-07-24-Ukun an
tinan rua nulu resin ona maibe Komunidade iha Suku Tashilin, Postu
Administrativu Zumalai, sei nafatin susar atu asesu ba fasilidade saude.

Tanba ne’e. Xefe Suku Tashilin
Jacob Alves kodigu Taroman, husu governu atu hari fasilidade saude ida iha
Tashilin nune’e komunidade sira ne’ebe moras fasil hetan atendementu husi
mediku sira.

“Ha’u nudar Xefe suku lori
komunidade tomak nia naran husu ba Ministeriu Saude atu harii sentru saude ka
postu saude ida iha Tashilin, tanba durante ne’e liliu ba inan isin rua sira no
hetan moras ruma defisil tebes atu lalais to’o iha sentru saude iha Postu
Zumalai ne’e araska loos, komunidade transporte laiha, inan isin rua sira atu
ba partu presija telefoni, dala ruma mos seluk ojek sa’e hodi lalais ba to’o
iha fasilidade saude, ho razaun hirak ne’e, hanesan autoridade lokal ka
lideransa komunitaria hakarak ne’e tau duni Postu Saude iha ha’u nia suku
Tashilin” dehan  Xefe Suku
Tashilin Jacob Alves kodiku Taroman ba jornalista sira iha nia k’nar fatin,
Tashilin Sesta (26/07).

Taroman fundamenta, komunidade
sira konkorda fornese rai ba estadu hodi hari postu saude  Suku Thasilin, nia dehan desizaun ne’e
komunidade no autoridade suku sira desidi hamotuk liu husi enkontru entre konsellu
suku ho komunidade sira.

“Komunidade hotu iha Suku
ida ne’e hotu-hotu konkorda atu oferese rai ba governu oinsa Ministeriu Saude
bele tau planu hodi harii postu saude, foin dadauk ami enkontru iha ne’e husi
parte saude kestiona maka’as dehan ita nia uma saude nian ida uluk ne’e husi
hela husi governasdaun Indonezia nian ne’e iha, ida ne’e iha duni maibe fatin
ida ne’e izoladu no fatin ida ne’ebe dook liu husi komunidade” nia
dehan.

Entertantu tuir Xefe Suku
Tashilin Jacob Alves kodigu Taroman, dehan durante ne’e komunidade sira hetan
moras liliu ba inan isin rua sira atu asesu ba iha fasilidade saude tenki lo’o
dook to’o Kapital postu Administrativu Zulamai.

Jornalista : Julio Salinas

Editor      : Chanot Nahac