Covalima (RCCT) 28-11-Komemorasaun loron proklamasaun Independensia Timor Leste ba dala 49 ne’e sai hanesan loron importante ida ba Timor oan hotu atu halo reflesaun hodi hanoin hikas jornada tempu uluk ho istoria moruk sira iha luta nia laran.
Ministru Komersiu Industria (MCI-Sigla Portuguesa), Filipus Nino Pereirra hatete Jornada iha tempu pasadu mak lori mai timor oan hotu hodi hatudu unidade nasional ida ne’ebé metin nune’e bele kontribuia ba dezenvolvimentu liu husi ema hotu nia involvimentu.
“Ho partisipasaun komunidade nian inklui autoridade sira iha Covalima ita hotu-hotu halo reflesaun iha jornada pasadu ita iha istoria moruk ne’ebe lori ita mai iha momentu ida ne’e atu hatudu katak ita nia unidade nasional ne’e importante tebes ita bele dezenvolve rai ida ne’e, partisipasaun ema hotu-hotu nian komponente hotu-hotu, iha nivel hotu-hotu para ita bele fo liman ba malu servisu hamutuk bele lori rai ida ne’e ba oin, ” informa Ministru Komersiu Industria (MCI), Filipus Nino Pereirra ba jornalista sira hafoin hamutuk ho komunidade Suai komemora Loron Proklamasaun Independensia ba dala 49 iha Kampu Ladi Suai, Kinta (28/11).
“ha’u hanoin ita refleta fila fali ba mensajem Prezidente Republika nian ba ita hotu katak ne’e nakonu ho esperitu paz, dame, rekonsiliasaun ne’e sai asuntu prinsipal estadu nian ne’ebé peresija kontribuisaun masimu husi sidadaun hotu, ne’ebé ita espera katak ho selebrasaun tinan 49 ita aniversariu proklamasaun independensia ne’e bolu fila fali ita, fanun fila fali ita Timor oan hotu-hotu tenki hamutu mai ho speritu foun ho konsiensia foun para ita bele promove ita nia paz, dame unidus ne’e la’os de’it iha ibun tutun maibe importante liu ita tau iha pratika, kontribuisaun real husi parte hotu” Tenik Governante ne’e.
Ministru Komersiu Industria (MCI), Filipus Nino Pereirra haktuir konaba mensajem prinsipal husi Prezidente Republika nian ne’ebé klaru tebes, tau prioridade ba iha infraestrutura, tanba fiar katak Primeiru Ministru sei esforsu hodi atinje metas dezenvolvimentu Infraestrutura baziku hotu.
“Mensajem prinsipal ohin, ita nia nai prezidente republika nian, iha infraestrutura bazika; be, saneamentu, edukasaun, saude, iha setor agrikultura ne’ebé ida ne’e konserteza ita nia nonu governu konstituisional ne’ebé lideradu husi Maun Bo’ot Xanana Gusmão sei halo esforsu hotu-hotu, ha’u hanoin mensajem Maun Bo’ot Kay Rala Xanana Gusmão iha diskusaun orsamentu jeral estadu ne’ebé promulgadu tiha ona husi prezidente republika ne’e bele dehan katak orsamentu povu nian signifika katak sei lori duni dezenvolvimemtu ida ne’e benefisariu loloos maka ita nia povu, ne’ebé ita nafatin iha espritu hakarak servisu hamutuk, involvimentu husi parte hotu ne’e importante tebes, ita sura sidadaun hotu-hotu nia partisipasaun, ne’e realmente sidadaun hotu-hotu nia vontade no ita hotu bele kontribui ba dezenvolvimentu rai ida ne’e” Tenik Governante ne’e.
Iha Komemorasaun Loron Nasional 28 Novembru iha Covalima ne’e, Ministru Komersiu Industria, Filipus Nino Perreira sai nudar Inspetor da serimonia ba serimonia hasa’e badeira nasional RDTL.
Partisipa iha atividade importante ne’e mai husi Reprezentante membru Parlamentu Nasional, Prezidente Autoridade Munisipiu Covalima ho Nia estrutura, Komandante PNTL Covalima, Komandante F-FDTL Destakada iha Tilomar Covalima, Veteranu sira, Diretór Servisu delegasaun teritorial sira, Padre no Madre sira, Komunidade husi suku 5 ne’ebé partensia ba iha Postu Administrativu Suai, Juventude no Estudante sira.
Jornalista : Julio Salinas
Editor : Chamot Naha
