Covalima (RCCT) 26-11-24-Komemora loron proklamasaun Independensia ba dala 49 iha munisipiu Covalima sei anima ho atividade kurida Bisikleta husi Kefa, Atambua NTT Indonesia tama mai Covalima Timor Leste no mos sei iha atividade animasaun kuda halai taru no atividade prisipal maka isar badeira nasional iha kampu ladi suai.

Relasiona ho atividade hirak ne’ebé temi, Komandante PNTL Munisipiu Covalima Superintendente Polisia Calisto Gonzaga informa sei husu ajuda husi Unidade sira seluk hanesan Unidade Patrillamentu Fronteira (UPF), Unidade Polisia Maritima (UPM), Batalaun Ordem Publiku (BOP), no F-FDTL destakadu iha Tilomar hodi tulun komando PNTL Covalima fo seguransa iha ambitu komemorasaun 28 de Novembru.

“Ita prepara seguransa ba isar bandeira nian, talves atu komemora ida ne’e ita mos sei hetan kurida de Carvalho ho mos sikilista ka sepeda gunung ne’e mos mai, ne’ebé ita Munisipiu Covalima sei konsentra ba sikilismu, kurida de Carvalho, ba isar bandeira, purtantu ita iha rekursu ida ne’ebé insufsiente maibe ita tenta para atu bele husu UPF, UPM, BOP no mos ita nia F-FDTL iha Tilomar para atu bele ajuda koloka hela iha fatin sira ne’ebé maka kuandu hala’o isar bandeira ida ne’e iha planu operasaun ona” informa Komandante PNTL Munisipiu Covalima Superintendente Polisia Calisto Gonzaga.

Komandante ne’e mos subliña Komanadu PNTL Covalima inklui iha preparasaun hodi fo treinamentu ba korpu isar Bandeira Nasional iha kampu ladi no mos iha Postu Administrativu sira.  

“Partikularmente iha Munisipiu Covalima ita hahu ona primeiru, ita sei prepara hela alin estudante sira para bele halo isar bandeira ne’e tama ona loron tolu hanorin hela sira iha kampu Ladi tanba sei konsentra isar bandeira ne’e iha Ladi no mos iha postu administrativu sira polisia ajuda” nia dehan.

Entertantu maske ho numeru membru polisia menus iha Covalima maibe komandu sei garantia seguransa la’o di’ak basa sei servisu hamutuk ho unidade sira seluk ne’ebé destakadu iha Covalima hodi asegura selebrasaun 28 de Novembru bad ala 49.

Jornalista  :  Julio Salinas

Editor         :   Chamot Nahac