COVALIMA—–Komandante Polisia Nasional Timor-Leste (PNTL), Munisipiu Covalima, Superientendente Polisia, Basilio de Jesus, hatete partidu 17 maka halo kompetesaun eleisaun parlamentar tinan 2023, tanba ne’e husu ba ema hotu tenke simu rezultadu no partidu ida ne’e maka manan ne’e povu hotu manan, no husu ba lider partidu politiku sira hotu tenke simu rezultadu atu ne’e hodi hamenus polisia nia serbisu ba situasaun ida ne’ebe ema hotu lakohi akontese iha rai Covalima.
“Nudar Timor oan tenke sai nain ba rai ida ne’e lider sira tenke fo motivasaun diak ba ema hotu-hotu, ita iha partidu 17 tanba ne’e vida pratika demokrasaia, iha loron ida pasadu liu ba ita hala’o kampana politiku liu husi partidu ida-idak, mais kuandu ita remata tiha eleisaun hatudu ona ninia rezultadu katak partidu A ou B sai vensedor ita hotu sai vensedor, ida ne’e signifika fo menus ba polisia nia serbisu, polisia lakohi haree labarik sira provoka malu tanba ema seluk nia haruka” informa Komandante Polisia Nasional Timor-Leste (PNTL), Munisipiu Covalima, Superientendente Polisia, Basilio de Jesus, iha nia intervensaun iha STAE Munisipiu Covalima Tersa (23/05).
Komandante munisipiu ne’e husu ba lider partidu sira katak hatudu karakter ida ne’ebe diak hodi fo edukasaun sivika ida ne’ebe diak ba militantes sira hotu, kuandu ida ne’e sei dauk komprende fo nia komprende ba atu nune’e hodi bee minimiza konflitu iha baze, hotu-hotu tenke iha hanoin ida katak sai nain ba rai ida ne’e mesmu idelojia politika lahanesan maibe iha prinsipiu ida deit katak nain ba rai ida ne’e, se maka manan kaer ukun hodi hadia rai ida ne’e ema seluk sei la mai atu ukun tan rai Timor ida ne’e.
Komandante haktuir partidu ida ne’ebe manan mos hakarak atu hadia rai ida ne’e ema seluk sei la mai atu ukun fali Timor, ho nune’e maka bele kria pas, kria amizade ida entre hotu-hotu mai husi partidu la hanesan labele kria konflitu, labele ho sentiment odiu, maibe halakon tiha deit hahalok at sira.
Komandante ne’e husu ba lider partidu sira hotu tenke fuan boot, nakloke an atu bele fo edukasaun sivika ba militante sira hotu katak lakon hotu-hotu lakon karik manan mos hotu-hotu manan ida ne’e maka nudar komandante nia lia hameno ba lider partidu no povu Covalima laran tomak atu hotu-hotu tenke simu rezultadu eleisaun ne’e iha iha pas no dame nia laran.(azu)
