Covalima (RCCT) 06-01-25- Governu Liu husi Ministeriu Edukasaun Loke tan klase paralelu husi Eskola Sekundaria Jeral Publiku (ESGP-Sigla Portuguesa) Suai, hodi hafasil komunidade nia oan sira atu asesu ba edukasaun iha Postu Administrativu Fatumea Munisipiu Covalima.
Diretór Diresaun Nasional Ensino Sekundariu Jeral, Benzamin Gomes da Cruz Fernandes, hatete estabelese klase paralelu ne’e, bazeia ba pedidu ne’ebé komunidade prinsipalmente inan-aman estudante no mos Lideransa lokal sira hato’o ba Governu liu husi Ministeriu Edukasaun.
“Mai estabelese tan klase paralela ida iha Postu Fatumea Beseia ba pedidu ne’ebé komunidade sira, hare ba realidade, persija estabele eskola paralelu ida husi ensinu Sekundariu Jeral Seran Kotek Suai, hare ba distansia ne’ebé mak dok, husi suai mai iha kilometro tolu nulu resin entaun durante ne’e alunus sira hetan difikuldade bainhira sira ba eskola iha Covalima, entaun ministeriu iha interese duni para atu edukasaun hakbesik ba ema hotu no edukaaun hakbesik mai iha komunidade atu nune’e fatumea nia oan sira mos eskola to’o iha nivel Ensino Jeral ida ne’ebé mak besik ” Diretór Diresaun Nasional Ensino Sekundariu Jeral, Benzamin Gomes da Cruz Fernandes, esplika.
Prezidente Autoridade Munisipiu (PAM) Covalima, Miguel Armada Cardoso “Razão” Apresia ba inisiativa husi inan aman estudante sira nian ne’ebé iha komitmentu di’ak kopera ho autoridade sira hodi esforsu halo pedidu ba Governu atu hakbesik edukasaun ba iha komunidade.
“Hato’o agradeses, tanba Autoridade Postu ida ne’e ho lider komunitariu sira iha interese di’ak hodi halo konvoka reniaun hodi nune’e hato’o ona ba iha Nasional liu husi ita nia Diretóra Servisu Edukasaun Munisipal no mos Sekretariu Munisipiu Asuntu Sosiais. sira iha servisu di’ak. Loke ona klase paralelu iha postu ida ne’e,” Dehan PAM Covalima, Miguel Armada Cardoso (Razão).
Serimonia lansamentu Klase palelelu iha Postu Fatumea ne’e partisipa husi Diretór Diresaun Nasional Ensino Sekundariu Jeral, Prezidente Autoridade Munisipiu Covalima, Diretóra Edukasaun Munisipiu Covalima, Representante Veteranu no mos Profesor no Profesora sira inklui Administrador Postu Administrativu Fatumea, Lideransa Komunitaria no Komunidade sira.
Entretantu dadaun ne’e Estudante iha klase paralelu Fatumea hamotuk ema na’in hitu nulu resin tolu.
Jornalista : Alfredo Barreto
Editor : Chamot Nahac
