Covalima (RCCT) 20-12-24-Atu kuida no fo protesaun ba ambiente no floresta iha Timor-Leste bele sai matak no buras di’ak liu maka governu iha planu hodi kontinua alarma ba komunidade sira hotu ho atividade ka programa tara bandu iha suku.
Sekretaria Estadu Floresta, Fernandinho Vieira, hatete politika governu iha 2025 sei kontinua ho atividade tara bandu, nune’e komunidade sira bele iha responsabilidade fo protesaun ba ambiente, bioversidade no seluk tan.
“Tinan oin 2025 ita nafatin kontinua sei halo programa ida ne’e, hodi nune’e komunidade sira mos iha responsabilidade oinsa bele fo protesaun ba ita nia ambiente, ita nia floresta, ita nia bioversidade ne’ebé maka ita iha, oinsa ita jere halo jestaun ba rai no bee, tanba hare katak problema bo’ot ne’ebé akontese iha mundu tomak liliu iha Timor-Leste kuandu mosu bai loro naruk ita laiha bee, tanba bee sira ne’ebé udan tau mai ne’e halai sulin tun ba mota hodi tun ba hotu tasi, tanba laiha protesaun natural ne’ebé maka iha” informa Sekretaria Estadu Floresta Fernandinho Vieira, ba jornalista sira hafoin partisipa iha serimonia tara bandu ne’ebe hala’o iha Suku Ogues Postu Administrativu Maukatar, Kuarta (18/12).
“oinsa mak ita atu halo protesaun natural ne’ebé maka nia sustentabilidade, presija kuidadu no konserva ita nia floresta hodi nune’e udan bee tau mai ne’e tenke konserva iha floresta laran hodi nune’e akontese bai loro naruk ita iha bee hodi fo moris ba komunidade no animal inklui ai horis sira iha rai laran” Tenik Governante ne’e.
Govenante ne’e mos afirma governu garantia sustentabilidade hodi akompaña programa tara bandu, liu husi servisu hamutuk ho autoridade komunitaria no lia na’in sira.
“Governu garantia nafatin sustentabilidade ba programa ida ne’e tanba ita iha corpu guarda floresta, ita mos iha lia na’in sira, ita iha autoridade lokal sira hanesan xefe suku, xefe aldeia ita hamutuk para atu fo akompañamentu ba tara bandu, hanesan tara bandu ne’ebé ita hala’o ona iha Suku Ogues ne’e, nia sustentabilidade longo prazu ne’e iha, hodi nune’e ita bele halo espansaun mos ba iha suku sira seluk, ha’u garantia katak ninia sustentabilidade sei iha tanba ita la’os de’it liu husi tara bandu mas politika governu nian oinsa para nafatin halo sensibilizasaun hamutuk ho corpu guarda floresta inklui tekniku agrikultura iha munisipiu nafatin halo sensibilizasaun ba ita nia komunidade hodi nune’e ita nia komunidade iha responsabilidade no iha maturidade politika oinsa atu bele iha dever obrigasaun kuidadu floresta” nia dehan.
Sekretaria Estadu Floresta Fernandinho Vieira, husu ba autoridade lokal liliu xefe suku, xefe aldeia no lia na’in sira atu halo akompañamentu no nafatin suporta programa tara bandu hodi proteze no konserva natureza, balada sira nia fatin nune’e mos ema ho ema tenki nafatin respeita malu tuir regra tara bandu ninian ne’ebé iha ona.
Jornalista : Julio Salinas
Editor : Chamot Nahac
