Covalima (RCCT) 29-12-24-Sabadu ne’e (28/12) governu liu husi Ministériu Administrasaun Estatal (MAE) hamutuk ho autoridade sira hala’o inagurasaun ba residensia Prezidente Autoridade Munisipiu Covalima nian ne’ebé implementa liu husi projetu Planu Dezenvolvimentu Integradu Munisipál (PDIM) tinan 2021 ho montante osan hamotuk $262,570,00, ne’ebé FInaliza konstrusaun iha tinan 2023.
Reprezenta Ministru Administrasaun Estatal Amandio Paulino de Sousa, iha nia intervensaun hateten Planu Dezenvolvimentu Integradu Munisipál (PDIM) no Programa Nasionál Dezenvolvimentu Suku (PNDS) sai hanesan indikador ba avaliasaun tanba ne’e husu ba autoridade hotu iha Covalima atu tau matan hodi kontrola implementasaun programa rua ne’e.
“PDIM hanesan indikadores ida ba avaliasaun kondisaun minim atu ba iha poder lokal, ita hotu hatene katak iha programa importante rua hanesan PDIM ho PNDS tan ne’e husu ba autoridade hotu-hotu liliu ba autoridade iha ne’e ho estrutura tomak tenki suporta husi parte seguransa atu kontrola didi’ak implementasaun programa rua ne’e iha autoridade Covalima” informa Reprezenta MAE.
Prezidente Autoridade Munisipiu Covalima Miguel Armada Cardoso “Razão” dehan obra refere finaliza iha 2023 la konsege halo inagurasaun no ohin bele inagura ba residensia ida ne’e inklui ho projetu- 4 seluk ne’ebe lao iha Covalima.
“Orsamentu ita rai iha 2021 no obra refere finaliza iha 2023 maibe ita la halo inagura tanba iha situasaun mudansa buat balu, alende inagurasaun ba ida ne’e mos PAM ho nia estrutura tomak hanoin hela atu iha Natal hamutuk kuaze iha tinan ida nia laran ita esforsu an halo servisu seluk maske iha fulan 10 nia laran Prezidente Autoridade Munisipiu foin maka pose, ita esforsu an hodi susesu buat balu tanba ida ne’e ohin dader ita inagura projetu-4 no iha projetu-3 seluk maka sei halo inagura tuir mai tanba atinje pursentu 96 maibe projetu-4 maka remata ona, ho ida ne’e PAM nia hanoin tau hamutuk no sai habo’ot iha fatin ida ne’e hodi inagura residensia PAM nia fatin” informa PAM.
Entertantu kontrusaun ba residensia ne’e konstrui husi Kompania Verde Kaisahe Unipesoal. Lda no residensia ne’e rasik nia medida 30.70×2250 metro. Ho total orsamentu ne’ebé preve hamotuk dolar Amerikanu rihun atus rua nen nulu resin rua, atus lima hitu nulu ($ 262.570) ne’ebé mai husi orsamentu Jeral Estadu 2021 nian.
Jornalista : Julio Salinas
Editor : Chamot Nahac
