Covalima (RCCT) 10-12-24-Tersa ne’e governu liu husi Ministeriu Solidariedade Sosial no Inkluizaun (MSSI) apoiu kalen tahan 60 no kulsaun (Toba Fatin) ida difisiente Francisco Amaral, iha Aldeia Sanfuk, Suku Kamanasa, Postu Administrativu Suai.
Apoiu ida ne’e entrega direta husi Prezidente Autoridade Munisipiu (PAM) Covalima, Miguel Armada Cardoso “Razão”.
Hafoin remata entrega sasan hirak ne’e ba difisiente Francisco Amaral, Prezidente Autoridade Munisipiu (PAM) Covalima, hatete apoiu ne’e hanesan kontinuasaun husi atividade iha semana kotuk ne’ebé Ministra Solidariedade Sosial bo Inkluzaun (MSSI) Veronica das Dores ho ekipa halo vizita hodi hare kondisaun no problema ne’ebé durante ne’e Francisco hasoru iha moris lor-loron.
“Ministra Solidariedade Sosial ho Inkluzaun (MSSI) Veronica das Dores mai halo ona vizita nia na’in rasik, mai hare hodi fo ajuda ona buat balu, tanba ne’e liu husi nia promete ne’ebé nia iha maka agora daudaun Autoridade Munisipiu Covalima mai hodi kumpri desizaun ne’ebé ministra rasik hatu’ur ona, tan ne’e mak ohin loron mai kontinua fo apoiu ba ita nia difisiente Francisco.” informa Prezidente Autoridade Munisipiu (PAM) Covalima, Miguel Armada Cardoso “Razão”.
Prezindete Autoridade Munisipiu Covalima mos kompremente sei Apoiu Sanyo ida ba Difisiensia Francosco hodi fasilita nia asesu ba be mos.
Tanba ne’e, Xefe Aldeia Sanfuk Antonio Arcanjo motiva Francisco atu aproveita didi’ak apoiu sira ne’ebé governu fo liu husi Ministeriu Solidaridade Sosial no Inkluzaun nune’e bele utiliza ba durasaun tempu ne’ebé naruk.
“Ha’u nudar autoridade lokal kontente tanba sira husi MSSI ne’ebé reprezenta husi PAM, ne’ebé hau hanesan xefe aldeia sente kontente no haksolok tanba ha’u nia komunidade bele hetan apoiu husi governu liu husi MSSI no husu ba Francisco ho nia famili atu kuidade sasan sira ne’ebé estadu fo no labele fa’an tutan ba ema seluk liliu kalen no ida toba fatin nian ne’e, tanba ba futuru buat barak maka estadu atu sei fo apoiu nafatin” informa Arcanjo.
Engkuantu distribuisaun apoiu husi MSSI ba difisiensia Francisco Amaral iha Sanfuk ne’ebé entrega, PAM Covalima ne’e hanesan kalen (Zinku) tahan 60, toba fatin (Sponza) ida, no sumasu rua. Iha distribuisaun ne’e akompaña mos husi funsionariu Sentru Solidaridade Sosial no Inkluzaun Munisipiu Covalima.
Jornalista : Julio Salinas
Editor : Chamot Nahac
