Covalima-RCCT- Juventude no Komunidade Municipio Covalima sunu lilin hodi fo ondra ba padre na’in 3 no sarani sira nebe mak fakar ran tanba hetan oho husi Milisia Pro Indonesia iha Igreja Ave Maria Suai.
Juventude iha area merkadu Kapital Municipio Covalima Makximus Sarfles Carvalho hateten aktividades sunu lilin ne’e atu hodi fo omenagen ba amu Lulik nain tolu (3) no sarani lubuk ida ne’ebe mak mate iha Igreja Ave Maria Suai iha tinan 21 liu (1999).
“Sunu lilin ida ne’e atu omenagen ba ita nia Amu Lulik na’in 3 no sarani sira nebe mak mate iha Igreja Ave Maria Suai tanba hakarak ukun aan ida ne’e.”dehan Juventude Makximus Sarfles Carvalho
Iha sorin seluk Delfia Gusmão konsideira sunu lilin ne’e hanesan parte ida Atu lembra fali akontesementu nebe akontese iha Tinan 21 ba kotuk iha Igreja Suai atu nune’e hanesan Joven la bele haluha historia ba masakre ne’e.
“ohin kalan ida ne’e ita atu hanoin hikas Amu na’in 3 no sarani sira ne’ebe mak Mate iha Igreja Ave Maria Suai no mos liu husi serimonia sira ne’e mak ita labele haluha istoria kona ba Akontesementu ne’e.”Delfia haktuir.
Molok Juventude sira sunu lilin iha estrada ninin maibe antes ne’e iha Domingo loron hala’o ona aktividade misa hafoin kontinua kari ai funan iha fatin akontesementu iha Igreja tuan nia oin tamba monumentu masakre nian rehablitasaun sei dauk finalize.
Jornalista : Aje
Editor : Chamot
