Covalima (RCCT) 13-02-25-Kinta ne’e Federal Insurance Timor (FIT) S.A realiza seminariu hodi desimina informasaun ba autoridade sira iha Munisipiu Covalima konaba sira nia vizaun no misaun relasiona ho seguru ba vida ka siguransa sosial.
Manager Marketing Federal Insurance Timor S.A, Herman Pane, hatete liu husi fahe seminariu ne’e atu loke komprensaun autoridade liu liu funsionariu sira nian hodi bele hatene di’ak liu tan konaba benefisiu husi siguransa sosial.
“Objetivu husi seminariu ida ne’e maka oinsa dezamina informasaun, oinsa maka sosializa ba iha publiku ne’e relasiona ho ami nia misaun ne’ebé iha katak oinsa maka ami bele fahe informasaun benefisiu husi seguru ne’e saida, no mos oinsa maka ema bele komprende didi’ak no ema bele sosa, utiliza seguru ne’e ba iha sira nia vida no sira nia negosiu ba entidade hotu iha Munisipiu Covalima, materia ne’ebé ohin ami halo aprezentasaun la ses husi produtu ne’ebé durante ne’e ami fornese ba iha publiku, seguru ba iha uma, sasan no ekipamentus, no mos iha personil, seguru ba iha funsionariu ka trabalador sira, seguru ba iha motor no kareta, seguru ba iha responsabilidade publiku liliu sira hala’o atividade servisu ba iha publiku, inklui ba iha atividade negosiu sira hanesan loja ka kioske karik hetan afeta husi dezastre ruma, no mos ami iha seguru viazem travel insurance” informa Manager Marketing Federal Insurance Timor S.A, Herman Pane.
Sekretariu Munisipal Administrasaun Finansas no Rekursu Humanu Munisipiu Covalima, Alberto Moniz de Araujo, hatete seminariu atu fo hatene ba ema hotu atu hetan siguransa sosial wainhira hasoru asidente ho transporte publiku.
“Seminariu ida ohin ne’e realiza husi Federal Insurance Timor S.A, iha okupasaun Indonezia nian bolu dehan asuransi jiwa ka bolu dehan Jaminan Sosial Tenaga Kerja (JAMSOSTEK), ne’ebé seminariu ohin ne’e foka liu ba asidente personal ka ema ne’ebé lori transporte publiku hetan dezastre sira bele hetan asuransi ba sira nian an bainhira sira hetan dezastre, ida ne’e pela primeiru ves iha Covalima, hanesan autoridade sente orgullu tanba sira husi Federal Insurance Timor S.A bele mai halo seminariu ida iha ne’e hodi partilla informasaun ligadu ho sira nia vizaun ho misaun ba sira nia komania ida ne’e, ita hotu hatene katak Covalima estadu nasional fo sai ona katak aban bainrua sei sai sidade industria karu tinan 5 oin mai tan ita sei iha dezenvolvimentu lubuk ida tan ne’e ho prezensa Federal Insurance Timor S.A nia hetan lisensa husi Banku Central Timor-Leste (BCTL) atu nia bele loke insurance ida ne’e munisipiu sira hotu” nia dehan
Enkuantu iha seminariu ne’e Sekretariu Munisipal Administrasaun Finansas no Rekursu Humanu Munisipiu Covalima, Alberto Moniz de Araujo, rekomenda ba Federal Insurance Timor S.A, katak seminariu ka desimina informasaun ne’e labele para de’it nivel munisipiu, maibe bele partilla mos informasaun hanesan to’o iha nivel postu no suku, nune’e komunidade sira iha postu mos bele hatene konaba Seguru ba Vida.
Jornalista : Julio Salinas
Editor : Chamot Nahac
