Covalima (RCCT) 04-12-24-Hela de’it loron 10 atu taka ona ezekusaun Orsamentu Jeral Estadu (OJE) 2024 nian, maibe Covalima foin maka ezekuta 74,1%.
Prezidente Autoridade Munisipiu Covalima, Miguel Armada Cardoso “Razão” hatete la atinji taxa ezekusaun OJE 2024 ne’e iha ligasaun pose ba Autoridade simu ne’ebé simu tarde nune’e prosesu tomak ezekusaun liu husi aprovizionamentu.
“Kona ba prosesu ezekusaun Orsamentu Jeral Estadu 2024 nian iha Munisipiu Covalima ezekuta ona pursentu 74,1, liu husi prosesu tomak ita tarde tanba PAM pose tarde no prosesu tomak liu husi aprovizionamentu la foti desizaun ida arbiru maibe liu husi prosesu aprovizionamentu tanba ida ne’e maka tarde, maibe ha’u fiar katak, liu husi reuniaun alargadu ida ohin ami hodi identifika iha ami nia lakunas balu no identifika mos ami iha obstaklu balu ba iha problema lakunas hanesan tarde prosesu iha ezekusaun ladun apar ka ladun familiarismu ho sistema hirak ne’e hotu ami identifika osan iha fatin balun la’o ladun di’ak no balu bele la’o ona” dehan PAM Covalima Miguel Armada Cardoso “Razão” ba jornalista sira iha nia kna’ar fatin hafoin remata reuniaun alargada ho Sekretariu na’in-3 no diretór servisu munisipal sira iha Salaun Administrasaun Munisipiu Covalima, Tersa (04/12).
Razão garantia iha loron 11 nia laran sei esforsu hodi hasa’e taxa ezekusaun husi pursentu 74,1%.ba pursentu 85%.
“Sistema hatudu katak 15 Dezembru 2024 ne’e taka ninia sistema ezekusaun, maibe ami fiar katak iha loron 11 ne’e tanba ami iha ona prosesu nia laran ne’ebé iha ona Finansas no aprovizionamentu hein pagamentu, ha’u fiar katak iha loron 11 nia laran ne’e ami bele halo pagamentu no ami bele hetan ona pursentu 85 ba ezekusaun nian, tanba ida ne’e maka ohin loron ami halo reuniaun alargada, atu nune’e diresaun ka servisu munisipal ida ne’ebé iha prosesu sei tarde ou nia sei hela ho aprovizionamentu nia sei hela ho finansas tenke na’in mos buka tuir para bele lais uitoan” Armada deklara.
Enkuantu tuir portal transferensia publiku fo sai katak ezekusaun Orsamentu Jeral Estadu 2024 nian ba Munisipiu Covalima ezekuta osan foin atinje pursentu 74,1%.kompara ho munisipiu seluk, Covalima hamrik iha liña ida ikus liu, maibe hare ba kestaun ida ne’e liu husi reuniaun alargada PAM Covalima Miguel Armada Cardoso “Razão” no Sekretariu na’in-3 inklui diretór servisu munisipal sira sei servisu maka’as para iha loron 11 nia laran bele hasa’e taxa ezekusaun husi pursentu 74,1%.ba pursentu 85%.
Jornalista : Julio Salinas
Editor : Chamot Nahac
