Covalima (RCCT) 09-12-24- Eventu Timor Island Adventure ne’ebé partisipa husi Siklista na’in 49 ho sira nia Bisikleta aranka husi Fulan Fehan Atambua, NTT Indonesia mai Covalima Timor Leste. siklista na’in 49 ne’e mai husi nasaun tolu mak hanesan Indonesia, Australia, no Timor-Leste.
Kordenador Eventu Timor Island Adventure, Joel Maria Pereira, haktuir eventu realiza atu hodi hametin amizade entre nasaun Indonezia, Timor-Leste no Promove fatin Turismu ne’bé existe nanis ona iha Illa de Timor.
“Tuir vizaun husi Prezidente da Republika katak eventu ne’e iha objetivu prinsipal rua, tuir saida mak Prezidente ho Guverno hanoin, primeiru mak atu hametin relasaun entre sidadaun Timor-Leste ho Timor Osidental, liuliu komunidade sira ne’ebé mak hela iha lina fronteira, segundu maka oinsa atu promove sitiu turistiku ne’ebé mak nasaun rua ne’e iha liu-liu iha ilha Timor” Kordenador Eventu Timor Island Adventure, Joel Maria Pereira, haktuir.
Siklista Timor Oan, feto ida, Carolina Miguel da Costa, dehan maske eventu ne’e ki’ik maibe bele kontribui hodi hametin amizade entre timor oan sira ne’ebé sei hela iha NTT Indonesia no iha Timor Leste.
“Ha’u agradese ba komisaun organizadora maske eventu ne’e, hanesan eventu ki’ik ida maibe hanesan halo amizade nasaun rua Indonezia mai iha Timor-Leste no liu husi eventu ida ne’e karik iha esperansa ba oin atu hadi’a di’ak liu tan no atu bele promove ida ne’e ba iha nasaun sira seluk atu nune’e ita nia amizade ne’e bele metin liu tan iha nasaun Timor-Leste no nasaun sira seluk” Siklista Timor Oan ho numeru 023, Carolina Miguel da Costa hateten.
Eventu Timor Island Adventure ne’e Siklita na’in 49 kopostu husi Timor oan na’in 45, Indonezio na’in 1 no Autralianu na’in , ne’ebé aran etapa dahuluk, viazen ho bisikleta hahu husi destinasaun turistiku, Fulan Fehan, Iha Desa Dirun, Lamaknen, Belu, NTT ba Betun Malaka hodi kontinua ba tasi ibun (Pantai) Lodik iha Suku Litamali, Kecematan Kobalima, Malaka NTT. Etapa daruak Siklista sira viazen husi Betun Malaka mai fatin disinasaun Kalabosu iha Tasi Ibun Suai Loro, Postu Administrativu Suai, Munisipiu Covalima. Viazen etapa datoluk sei kontinua husi Covalima ba Munisipiu Manufahi. Etapa dahat husi Manufahi ba munsipiu Manatutu, etapa dalima husi Manatutu ba Munisipiu Viqueque no etapa final husi Viqueque ba Munisipiu Baucau.
Jornalista:Moichung
Editor :Chamot Nahac
