Covalima (RCCT) 06-01-25-Hahu Segunda feira lorn ne’e fulan janeiru (06/01) 2025, Eskola Sekundariu Jeral Publiku (ESGP Suai) hahu fo orientasaun ba kandidatus estudante foun ne’ebé rejistradu ona hamutuk ema na’in-540. Eskola Sekundaria Jeral Publiku Suai Simu estudante foun bazeia ba despaixu husi Ministeriu Edukasaun.
Orientasaun ba kandidatu estudante foun atu eduka estudante sira konaba regra no lala’ok ESGP Suai nian no mos halo rekuñesementu ba estudante foun sira konaba ambiente iha ESGP Suai. Tanba ne’e Adjuntu Diretór Eskola, Ana Doutel Sarmento Vong iha nia intervensaun husu ba estudante foun sira atu tuir orientasaun durante loron-6 nia laran ho didi’ak no tenki halo’o tuir saida mak komisaun orienta.
“Iha biban ida ne’e husu ba estudante foun sira tuir orientasaun ne’e ho di’ak no mos karik imi nia maun ka bin sira haka’as karik lalika lori sai ba to’o iha liur lori hato’o ba inan no aman sira, maibe tenke aprezenta ba iha profesor no prefesora sira iha eskola ne’ebé durante loron-6 nia laran sei akompaña ita bo’ot sira nia orientasaun ida ne’e, husu ba imi durante loron 6 nia laran ne’e tuir to’o hotu karik iha balu moras ruma bele hato’o mai iha komisaun, husu mos ba ita bo’ot sira atu rona no hakerek saida maka orador sira ko’alia iha palestra ida ne’e no bainhira sai ba iha liur imi nia bin ho maun sira saida maka ohin loron imi tuir palestra ohin loron nian” informa Adjuntu Diretor ESGP Suai Ana Doutel Sarmento Vong.
Reprezenta Diretóra Servisu Munisipal Edukasaun Munisipiu Covalima Florindo do Carmo, hatete orientasaun ne’e atu hanorin buat foun ba kandidatu estudante foun sira hodi bele kuñese di’ak ambiente iha eskola sekundaria jeral publiku suai.
“Orientasaun atu mai orienta buat ne’ebé maka foun, simu buat foun tanba ha’u nia oan sira mai husi eskola ne’ebé la hanesan no regras iha eskola ensinu baziku mos la hanesan ho nune’e mai iha fatin ida ne’e atu simu orientasaun tuir regras ou regulamentu interna sekundaria jeral nian, ne’ebé ha’u husu ba ha’u nia oan sira katak orientasaun ne’e la’os kastigu ema, la’os halo violensia maibe fo orientasaun loloos tuir buat ne’ebé maka esperiensia iha ona, ida ne’e ha’u husu ba ha’u nia oan sira tuir nafatin simu orientasaun atu bele adapta-an tuir eskola ida ne’e nian, la’os tuir fali ensinu baziku, ensinu baziku nia lala’ok seluk, tanba buat ida eskola la’o ho tempu no la’o ho tinan” nia dehan.
Enkuantu ba ano letivu 2025 Eskola Sekundariu Jeral Publiku Suai (ESGP-Sigla Portuguesa) simu estudante foun hamutuk ema na’in-540 tuir despasu ne’ebé fo sai husi Ministeriu Edukasaun iha tinan kotuk.
Jornalista : Julio Salinas
Editor : Chamot Nahac
