Covalima (RCCT) 17-01-25-Liu husi asaun protesta no komunikadu imprensa, veteranu sira iha Munisipiu Covalima konsidera lista edital ne’ebé publika iha loron 15 fulan Janeiru 2025 la justu tanba dadus konaba durasaun partisipasaun luta la tuir saida mak deklarante sira hato’o ona ba komisaun verifikador iha tinan hira liu ba kotuk.
Tanba ne’e Veteranu sira lamenta tebes ho lista edital 2009 ne’e tanba mosu erru balun no pratika familiarizmu, no mos hare liu ba koor partidu politiku ne’ebé komisaun verifikador sira halo iha validasaun dadus.
“Lori veteranu Covalima nia naran hato’o preokupasaun no lamentasaun konaba segundu rejistu veteranu 2009 no publika sai iha loron 15 fulan Janeiru 2025, ne’ebé hamosu erru lubuk ida no la justu ba veteranu segundu rejistu 2009, tanba ne’e ami hato’o ba Ministru Asuntu Kombatentes Libertasaun Nasionál, Gil da Costa “Oan Soru” no hato’o ba Prezidente Administrasaun Konsellu Kombatente Libertasaun Nasionál, Vidal de Jesus “Reakleman” katak ami nia lamentasaun maka hanesan lista editais segundu rejistu 2009 ne’ebe fo sai iha 15 fulan Janeiru 2025 durasaun partisipasaun luta la tuir deklarasaun ne’ebé deklarante hato’o hato’o ba komisaun verifikasaun, iha manipulasaun dadus husi komisaun verifikasaun ba tempu luta tanba hare liu ba familia no koor politik hodi promove sira nia maluk ka familia hodi hetan durasaun tempu ba 8 a 14 no 15 a 19″ Francisco de Alves, deklara Reprezenta Porta Vos Veteranu Munisípiu Covalima, Manuel Barbosa Pina “Mameran”
Veteranu sira mos kestiona konaba membru estrutura klandestina ne’ebé nia naran fo sai iha lista editais ninia durasaun tempu partisipasaun luta bo’ot liu ninia respinsavel.
“Sobrevivensia ne’ebé mate ona iha tinan 1977 maibe dadus partisipasaun klandestina sura nafatin to’o tinan 1999 ne’e akontese iha Zona Fatululik, membru estrutura luta klandestina ninian durasaun tempu barak liu ninia responsavel, ninia. Responsavel menus fali husi 8 a 14, ninia membru maka hetan fali durasaun 8 a 14, ho erru sira ne’ebé maka ami hato’o husu ba nai ulun sira atu tau atensaun masimu hodi hala’o auditoria no investigasaun ba komisaun verifikasaun ne’eb’e halo manipulasaun ba dadus veteranu segundu rejistu tinan 2009” nia dehan.
Hatan ba lamentasaun hirak ne’e Komisariu Konsellu Kombatente Libertasaun Nasionál, Francisco Doutel Sarmento “Lamesak” rekuñese mosu erru iha validasaun dadus ne’ebé Ministeriu hala’o, maibe Lamesak sei esforsu hamotuk ho Veteranu sira iha Covalima hodi hato’o lamentasaun ne’e ba Nasional hodi hetan solusaun ne’ebé justu.
“Hakarak atu hato’o ba ita hotu katak la’os ha’u maka halo validasaun ne’e servisu ministeriu nian, ministeriu rasik halo validasaun maka ohin loron imi halo hanesan ne’e, se tuir loloos ne’e ami maka ba halo validasaun ba hare imi nia naran ne’ebé uluk ami halo verifikasaun ne’e, tan ne’e husu ba alin sira hakalma situasaun depois ami sei halo reuniaun ho imi nia Sekretariu Zona, sekretariu Nurep sira, formulariu preparadu kuandu reuniaun hotu maka halo karta ba iha ministeriu ho prezidente Konsellu Kombatente Libertasaun Nasionál iha Dili”
“Ha’u hakarak imi hotu ba iha 8 a 14 mais imi nia fixa ne’e ema la hare ida, la hatene sira tau iha ne’ebé ha’u la hatene, fixa ida validasaun, ami na’in-2 “Sakari” iha ne’eba mais ema nunka fo hatene ami atu valida, maibe tuir loloos prezidente konsellu atu halo saida validasaun ne’e atu hare imi nia naran ida ne’e ba 8 a 14, ida ne’e ba 15 a 19 mais lae ema nunka fo hatene ba ami, ami ba iha konsellu ne’eba estatua” dehan Lamesak.
Enkuantu liu husi konfensia imprensa ne’e veteranu sira hato’o ejijensia ba Ministru Asuntu Kombatentes Libertasaun Nasionál no Prezidente Administrasaun Konsellu Kombatente Libertasaun Nasionál halo fali reverifikasaun ba dadus segundu rejistu veteranu 2009, tenke hare fila fali fixa tuir pesoal ida-idak nia durasaun luta tuir lista editais hodi kompara fixa deklarasaun ne’ebé hato’o ba komisaun verifikasaun.
Jornalista : Julio Salinas
Editor : Chamot Nahac
