Covalima (RCCT) 17-01-24-Durante tinan rua nia laran hahu husi tinan 2022 no tinan 2023 servisu Alfandega Munisipiu Covalima konsege rekolla reseitas sa’e pursentu 15 kompara ho tinan rua ba kotuk.
Diretór Alfandega Munisipiu Covalima Nuno Nogueira, hatete iha tinan rua nia laran servisu Alfandega Covalima konsege rekolla taxa iha Fronteira Postu Integradu Salele, iha tinan 2022 Alfandega konsege rekolla reseitas ho montante U$ 375, 291.81 no iha tinan 2023 rekolla taxa ho montante U$ 431,842.5.
“iha tinan 2022 ita hasa’e taxa ho montante Dolar Amerikanu rihun Atus tolu hitu nulu resin lima, atus rua sia nulu resin ida walu nulu resin ida sentavus (U$ 375, 291.81) no tama ba iha 2023 nian rekolla reseitas sa’e maka’as liu tan ho montante Dolar Amerikanu rihun atus hat tolu nulu resin ida, atus walu hat nulu resin rua lima sentavus (U$ 431,842.5), tanba soma hamutuk taxa iha 2022 no 2023 sa’e ba iha pursentu 15 ida ne’ebé bo’ot tebes.” dehan Diretór Alfandega Munisipiu Covalima Nuno Nogueira, ba jornalista sira iha nia k’nar fatin Postu Integradu Salele Tersa (16/01).
Diretór Alfandega ne’e afirma taxa ne’ebé Alfandega rekolla mai husi importasaun normal inklui ho ema tama nai timor leste husi malaka NTT lori sasan liu husi presu dolar Amerikanu atus tolu resin ne’ebé tenke selu taxa ba Alfandega ho pursentu 5.
“Taxa ne’e ita hetan husi importasaun normal iha mos sasan sira ne’ebé ema lori depois ita nia funsionariu Alfandega sira haree kuandu nia pressu liu dolar Amerikanu atus tolu ($300) ne’e ita koleta taxa husi ida ne’e mos, liu husi dalan sira ne’e mak ita bele hetan montante ida bo’ot hanesan ne’e, ne’ebé Komisariu Adoneru publika ne’e inklui taxa husi Covalima nian mos” nia dehan.
Entertantu Diretór Alfandega Munisipiu Covalima Nuno Nogueira, garantia iha tinan 2024 ne’e Alfandega Munisipiu Covalima sei esforsu maka’as hodi hasa’ereseitas ne’ebé bo’ot liu to’o pursentu 20.
Jornalista : Julio Salinas
Editor : Chamot Nahac
