Covalima (RCCT) 06-01-25-Durante selebra Natal Loron 25 Fulan Dezembru 2024 no Tinan Foun 2025, Komandu PNTL Munisipiu Covalima resista kazu hamotuk hitu (7) ne’e hanesan kasu menor.
Komandante Polisia Nasional Timor Leste (PNTL) Munisipiu Covalima Superintendente Polisia, Calisto Gonzaga, relata durante selebra Natal 2024 rejista kazu 3 no Tinan Foun 2025 rejista tan kazu 4, maske nune’e durante selebrasaun loron bo’ot natal no tinan foun iha Covalima infrenta situasaun kalma no kontroladu.
“Iha Natal ita rejista kazu tolu (3) ida ne’ebé mak hanesan la’os grave maibe ita hotu hatene ema hakarak festeza ho familia talves hemu liu tia, entaun ho alkoliku ne’e sira akuza malu mais sira la uza forsa maior, depois to’o mai fali Tinan Foun ita mantein nafatin ho rekursu sira ne’ebé mak ita iha to’o iha horiseik dia tres ita iha reszultadu ita regista kazu 4 entaun hamutuk kazu hitu (7) maibe kazu sira ne’e mos kazu hanesan hemu tua depois provoka malu no hanesan kazu ida iha Thasilin no iha Suai Loro iha Lo’o Keu ne’e mos hanesan tanba hemu tua ho grupu depois sira sadik malu iha estrada entaun ita tun ba ita absolve situasaun sira ne’e kalma hotu” informa Superintendente Polisia Calisto Gonzaga, iha nia k’nar fatin segunda (06/01)
Superintendente Polisia Calisto Gonzaga fundamenta, iha ambito selebrasaun Natal 2024 no tinan foun 2025, PNTL Covalima la rejista kazu grave to’o rejulta ema mate nomos la iha asidente kompara ho tinan anterior sira.
“Ita kompara ho tinan kotuk, Covalima kazu tun, la iha akontese kazu maior por exemplu hanesan to’o ema mate ne’e la iha, asidente mos la iha ida rua ho motor lanu maibe ne’e ki’ik ita kompara ho tinan kotuk, balu ho kareta baku fila entaun tinan ida ne’e la iha ne’ebé ha’u hanoin mensagen sira ne’ebé mak ita fo sai ba ita nia komunidade no ba ita hotu tau importansia tamba ita nia festeza iha tinan ida ne’e laos ita mesak maibe ema hotu hakarak festeza ne’e festa familia ba natal festa ida ne’ebé maka ita tenkiser simu tanba ita ultrapasa fali tinan ida ba fali tinan seluk” Komandante PNTL Munisipiu Covalima Superintendente Polisia Calisto Gonzaga, Informa.
Entretantu durante selebra natal no tinan foun ne’e komandu Munisipiu Covalima koloka forsa konjuta hamotuk ema na’in 200 kompostu husi membru polisia komandu covalima, Unidade Patrullamentu Fronteira (UPF), Unidade Polisia Maritima (UPM), Batelaun Ordem Publiku (BOP), no Falintil-Forsa Defeza Timor Leste (F-FDTL) destakada iha Postu Tilomar.Membru hirak ne’e koloka ba iha fatin ne’ebé maka identifika hanesan iha Igreja Suai, tasi ibun Suai Loro, Kasabauk no mos iha fatin seluk ne’ebé identifika ona.
Jornalista : Alfredo Barreto
Editor : Chamot Nahac
