Covalima (RCCT) 16-01-25-Deskunfia ema balu ne’ebé uluk lakohi kontribui ba luta ukun rasik an, ne’ebé 1999 involve an iha grupu organizadu milisia pro otonomia Mati Hidup Dengan Indonesia (MAHIDI), naran mosu iha lista edital Veteranu ne’ebé rejistradu iha tinan 2009 hodi hetan pensaun 8 a14.
Hatan ba publiku nia lamentasaun ne’e, Joaquim Barros “Sikat Let” ne’ebé uluk lidera kaixa iha Laku Zona Zumalai, rekoñese ema na’in tolu ne’ebé publiku kestiona tanba deskunfia Milisia MAHIDI ne’e uluk partisipa, kontribu no envolve nudar membru husi Kaixa Laku, maibe nia lahatene tuir wainhira sira muda an iha 1999 hodi elvolve fali iha Milisia MAHIDI.
“Sira na’in-3 ne’ebé ema kestiona iha Zumalai ne’e monu loos iha ha’u nia kaixa Laku iha Zona Zumalai, sira mesak ha’u nia membru hotu, sira uluk partisipa hamutuk ho ha’u iha ha’u nia luta, no ha’u nia membru kaixa, ikus mai iha 1999, tanba ha’u mos evakua sai ona husi vila iha fulan Janeiru 1999 no sira balu hela iha ne’eba, ne’e keta sira involve iha atividade ne’ebé lakohi ukun an ninian tanba ne’e maka naran sai sira foin fo sai katak sira ne’e membru milisia husi MAHIDI, maibe ha’u rasik la hatene buat ne’e, tanba ha’u rasik naran ida fo sai ne’e la’os ha’u maka indika katak ida ne’e hasai nia naran, ne’ebé ne’e ha’u mos la hatene tuir tanba saida maka nia naran ne’e sai ho kategoria 8 a 14 anos prega ba ema na’in tolu ida hanesan ne’e iha ne’eba” Sikat Let esplika.
Maske nune’e, Responsavel Kaixa Laku iha Zona Zumalai, Atual Sekretariu Konsellu Kombatentes Libertasaun Nasional, Munisipiu Covalima Joaquim Barros Kodigu Sikat Let, husu atu hato’o kontestasaun ba Konsellu Veteranu Munisipiu Covalima hodi kestiona ba ema balu ne’ebé Uluk Milisia Maibe hetan pensaun 8 a14 nune’e belee esklui husi lista edital.
“Karik ida ne’e akontese no hatene duni katak ultima partisipasaun se sira involve ona organizasaun ne’ebé lakohi independensia, prontu hatama kontestasaun nune’e sira labele hetan direitu hanesan ema veteranu, tanba ita la’o tuir lei ne’ebé maka vigora ona” nia dehan
Entertantu relasiona ho publikasaun naran veteranu ne’ebé rejista iha 2009 halo ema barak ladun satisfas tanba diskonfia ema ne’ebé uluk lakohi Timor Leste ukun rasik an barak mak hetan naran validu iha lista edital ho kategoria hetan pensaun ba tinan bo’ot, maibe ba ema sira involve iha luta to’o hetan turturasaun husi inimigu sira, ikus mai balu naran laiha lista, balu naran iha maibe hetan deit tinan 3 (3 a 7), no pior liu tan maka balu hetan menus husi tinan tolu no mos balu naran tama fali ba iha lista la’os kombatentes, maibe sira ne’ebé uluk involve iha MAHIDI iha parte zumalai nian hamotuk ema na’in 3 ho naran inisial AMM,AC no AB hetan fali pensaun 8 a 14 anos, iha lista edital veteran rejistradu 2009.
Jornalista : Julio Salinas
Editor : Chamot Nahac
