Covalima (RCCT) 27-11-24- Administrador Postu Administrativu Fohorem, Delfim Amaral, konsidera Osan ho montante dolar Amerikanu atus hitu lima nulu ($ 750) ne’ebé Governu aloka, la sufisiente atu utiliza ho organiza atividade ba komemorasaun loron Proklamasaun Independensia ba dala 49 iha Fohorem.
Administrador Postu Administrativu Fohorem, Delfim Amaral, esplika atividade mobilizasaun populasaun husi suku 4 iha fohorem atu lori badeira suku konsenta iha fatin isar bandeira sei hala’o iha loron 27 loro karaik no populasaun sei desloka fila iha loron 28 loro kraik hafoin remata serimonia hatun bandeira nasional, hodi ida mak Administrador postu ne’e konsidera osan atus hitu lima ne’e la sufisiente.
“Ami foin hetan informasaun horseik, atu mai foti ami nia osan atu hodi komemora loron 28 novembru ba dala 49, ne’ebé ba tinan ida ne’e ami Fohorem hetan orsamentu ho montante $ 750 no orsamentu ida ne’e hetan apoiu husi ita nia estadu atu hodi mobiliza ita nia komunidade husi suku-4, ne’ebé hahu oras ida lorok kraik komunidade husi suku-4 ne’e lori ona bandeira tama mai iha postu, ne’ebé ha’u sente lato’o ho orsamentu ne’ebé governu koloka mai ne’e tanba husi ha’u nia suku-4 ne’e oras loraik tuku 2 tama ona sira presija mos han no hemu, depois sei hader oras ida kalan hodi daka bandeira, depois iha dader matebisu hodi prepara ba hasa’e bandeira hotu to’o loro ktaik hatun bandeira hotu maka foin fahe malu” informa Administrador Postu Administrativu Fohorem, Delfim Amaral, ba jornalista iha Kampu Ladi Kamanasa, Kuarta (27/11).
Administrador Postu Administrativu Fohorem, Delfim Amaral, haktuir ho orsamentu ne’ebé limitadu labele organiza komunidade partisipa hotu iha komemorasaun loron istoriku ida ne’e.
“Iha ne’eba susar uitoan mak ne’e ho orsamentu $ 750 ita labele mobiliza komunidade sira maioria tanba ita fahe orsamentu ne’e ba parte xefe suku sira, ba ekipa isar bandeira, halo dekorasaun ba administrasaun postu osan ne’e lato’o, no agora mai hala’o hela mos atividade jogu voly bol feto no mane no iha oras ida kalan ami sei atividade kompetisaun kultural, tebe likurai kada suku, depois iha dader serimonia isar bandeira hotu sei iha atividade dada tali kada suku, ho ida ne’e ami sei buka hela orsamentu hodi apoiu ba ita nia komunidade sira, maibe ba orsamentu ida governu koloka ho montante $ 750 ba de’it kosumu hanesan hola hahan no bee, maibe ba atividade sira ne’ebé hala’o hodi anima komunidade administrador postu ho strutura sei buka fundus ketak ida hodi fo ba sira ne’ebé sai manan na’in ba iha kompetisaun ne’e” esplika Administrador Postu Administrativu Fohorem, Delfim Amaral.
Tuir Administrador Postu Administrativu Fohorem, Delfim Amaral, dehan husi orsamentu $ 750 ne’e komisaun koloka ona ba ekipa isar bandeira hetan osan ho montante dolar Amerikanu atus ida lima nulu ($ 150) ne’e lori sosa atributu ekipa isar bandeira nian, ba suku-4 kada suku hetan osan ho montante dolar Amerikanu lima nulu ($ 50), ba eskola-4 mos hanesan hetan osan $ 50 hotu depois dolar amerikanu lima nulu ($50) lori husu misa iha Postu Fohorem, enkuantu Postu Administrativu Fohorem kompostu husi Suku, aldeia 15 ho total populasaun hamutuk ema rihun nen resin.
Engkuantu atividade ne’ebé komisaun organizadora estabelese ona ba komemorasaun 28 Novembru iha Fohorem mak hanesan kopetisian desportu jogu voly bol feto no mane husi kada suku, kompetisaun kultural, tebe liku rai kada suku, atividade dada tali kada suku no seluk tan.
Jornalista : Julio Salinas
Editor : Chamot Nahac
