Covalima (RCCT) 16-03-23, Komisaun Nasionál Eleisaun (sigla Portugés CNE) nudar orgaun administrasaun Independente, ho nia kompetensia, kompozisaun, organizasaun no funsionamentu regulada ho lei maka supeziona resenseamenttu no aktu eleitoral iha Timor-Leste no diáspora haktuir konstituisaun RDTL artigu 65.6.
Komisariu CNE destakadu Aileu no Covalima, Calistro Martins, hateten CNE hanesan orgaun administrasaun eleitoral iha pais ida ne’e, tan ne’e hanesan responsabilidade CNE nian fo kapasitasaun ba Ofisial Supervizaun Eleitoral (OSE) iha Covalima.
“CNE hanesan orgaun administrasaun eleitoral iha pais ida ne’e iha responsabilidade atu fo kapasitasaun ba Ofisial Supervizaun Eleitoral (OSE) ba iha eleisaun ne’e ne’ebe rekruta tiha ona ba Munisípiu Covalima nian purvolta ema na’in-222 atu sai hanesan Ofisial Supervizaun Eleitoral ba eleisaun parlamentar ne’ebe nai prezidente republika dekreta tiha ona monu iha loron 21 fulan Maiu 2023” informa Komisariu CNE destakadu Aileu no Covalima, Calistro Martins, ba jornalista sira hafoin fo formasaun ba OSE ne’ebe hala’o iha salaun Eskola Sekundaria Geral Publika (ESGP) Kinta (16/03).
Nia sublina objetivu prinsipal fo kapasitasaun ba OSE para sira bele dezenpena sira nia funsaun hanesan supervizor ba iha aktu eleisaun ne’ebe maka sei realiza husi tékniku sira husi Sekretariadu Tekniku Administrasaun Eleitoral (STAE), sira sei koloka iha kada sentru votasaun no mos estasaun votasaun iha Munisípiu Covalima.
Komisariu CNE destakadu Aileu no Covalima ne’e afirma formasaun ba OSE iha Covalima sei hala’o durante loron-3 hahu ohin no sei remata iha loron sábadu, materia ne’ebe sei delibera husi fasilitador sira mak fo konesimentu ho relativamente papel orgaun administrasaun eleitoral CNE nia papel alin OSE sira ne’e bele iha Konesimentu kona-ba instituisaun ida ne’e.
“CNE hanesan instituisaun estadu iha pais ida ne’e maka toma responsabilidade tau matan ba iha aktu eleitorais halo Supervizaun, halo monitorizasaun ba iha aktu eleitorais sira ne’e” nia esplika.
Nia afirma formasaun loron tolu na sira ne’e naton tanba hanesan mai fo kapasitasaun deit, materia ne’ebe sira hetan durante loron-3 aprezenta husi fasilitador sira ne’e halo tiha ona analiza ida naton ba sira atu dezenpena, sira bele halo Supervizaun iha sentru votasaun aktus eleitorais sira ne’e iha sentru votasaun no mos iha estasaun votasaun ne’ebe maka STAE estabelese ona Munisípiu Covalima.(JS)
