Covalima (RCCT) 30-12-24-Centro Joventude Covalima (CJC) Ne’ebé hetan apoiu fundu husi PAWANKA FUND no AIPP kontinua realija atividade Tara Bandu iha Suku Matai Postu Administrativu Maukatar, hodi hametin kultura ne’ebé bei ala sira rai ona ba Jerasaun foun.
Diretór Exekutivu CJC, Julio Ferreira, hateten Programa ne’e realija atu hodi hametin relasaun entre ema natureza no ambeinte nune’e hodi hases husi risku ba dezastre naturais alende ne’e hodi hametik idadetidade no kultura ne’ebé bei ala sira rai hela ona iha Suku Matai.
“Tarabandu ida ne’e katak ita atu hamoris di’ak liu tan nia kultura rai ida ne’e nian hodi nune’e jerasaun foun sira bele kontinua hatene katak fatin ida ne’e iha ninia lingua rasik, no fatin ida ne’e iha ninia kultura rasik, fatin ida ne’e mos iha ninia buat hotu hotu diferente tuir nia ema ka tuir ninia natureza ne’ebé ejisti. Entaun Tara Bandu ida ne’e atu ita hotu hotu kuidadu ita nia ambiente atu bele di’ak liu tan iha ita nia future, entaun buat ida ne’e atu la’o di’ak ita hotu hotu mak tenki kopera hamutuk, regulamentu hirak ne’e ita mak kuidadu hodi prezerva di’ak liu tan, hotu hotu bele banati tuir ka la’o tuir ita nia lei ida ne’e ejisti iha ita nia Suku Matai” Diretór Exekutivu CJC, Julio Ferreira, hateten.
Xefi Suku Matai Nuno Jose M Pereira, informa iha tinan 2022 konsellu suku no lian na’in sira hamotuk ho komunidade hala’o ona Tara Bandu iha Matai.
“Tara Bandu ida ne’e la’os foin hahu maibe la’o tia ona iha nai Xefe Suku sesante ne’ebé ami hala’o tia ona iha tinan 2022, maibe ba mandatu ida ne’e ami hakarak la’o fila fali hakarak hamanas fila fali ami nia regulamentu ida ne’e, atu suku ida ne’e bele la’o tuir no bele regula ami, no ami suku ida ne’e la’o bele hakmatek ” Xefi Suku Matai,Nuno Jose M Pereira, Informa.
Objetivu husi Tara Bandu ne’e atu kria relasaun di’ak entre ema ho ema, ema ho natureza no ema ho balada, hodi asegura rekursu naturais ne’ebé partense iha suku laran no mos hamoris konsensia komunidade atu kuidadu ambiente husi risku dezastre naturais.
Entrentantu iha loron 17 fulan Dezembru 2024, Centro Juventude Covalima (CJC) hala’o ona Tara Bandu iha Suku Holpilat hafoin mak kontinua iha Suku Matai Postu Administrativu Maukatar Munisipiu Covalima.
Jornalista:Moichung
Editor : Chamot Nahac
