Dili (RCCT) 14-12-24- Jornalista Timor-Leste hili ona membru na’in rua husi Organizaun Timor-Leste Press Uniaun (TLPU) ho Asosiasaun Jornalista Timor-Lorosa’e (AJTL) ba reprezenta konselleru ba jornalista Timoroan iha Konsellu Impresa (KI) ba periodu 2025-2029.
Jornalista timoroan hili reprezentante na’in rua ne’e, hafoin liuhusi konferensia nasional iha salaun katedral Dili, ne’ebé organiza husi konsellu Imprensa Timor-Leste.
Hafoin konferensia jornalista timoroan aprezenta kandidatu pakote rua kompostu husi kandidatu Horacio Babo ho Frances Suni mak sai adversariu ba kandidatu Cesar Mali ho Joaquim Coutinho (Akin Rakom).
Iha eleisaun ne’ebé la’o iha ambinete demokrasia, jornalista timoroan ne’ebé iha karteira professional indizita votu maioria ba kandidatu Cesar Mali ho Jaoquim Coutinho hetan vitoria ho votu 86 hodi halakon nia adversariu Frances Suni ho Horacio Babo ho votu 70.
Hafoin eleitu reprezenta Jornalista ba Konsellu Imprensa, Cesar Mali konfesa katak todan ne’ebé sira na’in rua simu maibe sei la servisu mesak, basa sei hamutuk ho jornalista hotu hodi defende jornalista sira no dezenvolve Liberdade Imprensa iha Timor-Leste.
“Ha’u agradese ba konfiansa ne’ebé kolega sira fo mai ha’u, ida ne’e hanesan responsabilidade ida ne’ebé ha’u tenke simu duni tanba ida ne’e mai husi ita bo’ot jornalista sira, ita bo’ot konfia ona ha’u, maibe ha’u sei la servisu mesak, ha’u kontinua sura ho ita bo’ot sira hotu para bele alkansa objetivu ne’ebé ita hotu buka, maka Liberdade Imprensa iha ita nia rain,” informa Cesar.
Nia esplika, konsileiru konsellu imprensa anterior sira halo ona buat barak, tanba ne’e ho konfiansa ne’ebé simu husi jornalista sira atu ba kontinu hatutan halo no kompleta hodi bele sai di’ak liu tan.
“Agora ami na’in hira atu ba ne’e la’os atu hadi’a, maibe ba atu hatutan no atu halo di’ak liu tan no atu kompleta buat ne’ebé sira seidauk kompleta iha sira nia mandatu, tanba ne’e ha’u sura ho ita bo’ot sira nia apoiu, ha’u sei didika ha’u nia an tomak atu servisu ba instituisaun ida ne’e atu bele garante ita bo’ot jornalista sira direitu no garante Liberdade Imprensa iha TL” esplika nia.
Konselleiru eleitu Cesar Mali kompromete iha nia mandatu sei dezenvolve no Dijitaliza kartaun karteira professional ne’ebé atribui ba jornalista sira. Nia mos sei kontinua halo kompleta ba servisu ne’ebé konseleiru anterior sira rai hela.
“Planu saida mka atu halo iha mandate tinan haat ne’e, ha’u seidauk iha hanoin, bainhira ami hetan ona pose husi Parlamentu nasional, iha ne’eba maka ami sei deside hamutuk, maibe hanesan ohin ha’u dehan ona katak barak liu ami sei kontinua servisu konseleiru konsellu imprensa sira anterior sira nian ne’ebé saida maka iha ona, maibe iha buat balu ha’u pesoalmente hakarak atu halo dezenvolve iha ne’eba depois ami na’in 5 hamutuk tiha maka ha’u foin halo inovasaun foun ka saida maka atu halo iha ne’eba hanesan ohin ha’u temi ona konaba kartau karteira professional ne’ebé agora, iha ha’u pesoalmente hakarak dijitaliza, kartaun ne’e di’ak ona maibe era dijital, ita presija halo buat ne’ebé avansadu liu tan, ida ne’e maka hau nia mehi” hakotu nia.
Entretantu iha konferensia nasional ne’ebé Konsellu Imprensa Timor-Leste Organiza la’o iha ambinete demokratiku tebes, jornalista sira halo kritika ho konstrutivu, nune’e Jonalista Timoroan sira ne’ebé hamahan an iha Organizaun tolu husi AJTL, TLPU no UPJTL hili ona reprezentante na’in rua mak sei reprezenta Jornalista Timoroan iha Konsellu Imprensa Timor-Leste ba Peridu Tinan Haat,
Jornalista : Julio Salinas
Editor : Chamot Nahac
