Xefe Sentru Saude Tilomar, Carlito Sebastião Belo, hatete iha tinan 2024 besik ona atu remata maibe SS Tilomar seidauk rejista kazu moras Tuberkloze no HIV kompara ho tinan hirak liuba ne’ebé rejista kazu tuberkloze hamotuk 13.
“Antes ha’u assume kargu hanesan xefe sentru saude, ha’u mos kaer programa TBC no HIV, ne’ebé bainhira pasiente TBC deteta iha aldeia ka suku sempre refere mai Sentru Saude ba iha laboratoriu hodi koko ran atu deteta mos moras HIV, ne’ebé durante ne’e iha kazu TBC-31 maibe ita nunka deteta kazu HIV, maibe ba tinan ida ne’e ita laiha kazu so iha tinan rua ka tolu liu ba ne’e ita iha kazu TBC ho HIV” informa Xefe Sentru Saude Tilomar, Carlito Sebastião Belo.
Carlito Sebastiāo Belo, dehan kauza husi moras Tuberkloze ne’e mai husi komunudade nia kuñesimentu ba ambiente mak sei menus no mos parte ida mai husi ekonomia familia.
“Moras TBC ne’e ita hare liu ba iha ambiente komunidade ne’ebé sira nia koñesementu ligadu ba saude menus, no ligadu ba kostume tradisaun bainhira komunidade na’in ida maka hetan moras TBC sira hela hamutuk iha uma lisan ida ninia uma fentilasi la di’ak, sirkulasaun anin tama no sai ladi’ak ema ida ne’ebé moras ne’e hela hamutuk ho familia iha uma laran ne’e durante nia vida moris, satan nia la hetan tratamentu moras ne’e bele da’et husi ema ida ba ema seluk, no parte ida mos ita hare ba iha kondisaun ekonomia moris ne’e la hanesan tanba labele konsumu ai han ne’ebé di’ak ba saude” nia dehan.
Tuir Xefe Sentru Saude Tilomar Carlito Sebastião Belo, dehan kazu moras tuberkloze hamutuk 31 ne’e kazu tuan ne’ebé rejista iha tinan rua ka tolu liu ba, maibe iha tinan 2024 hahu husi fulan Janeiru mai too iha fulan klaran Outobru nian Sentru Saude Tilomar seidauk rejista kazu foun konaba tuberkloze no HIV.
Jornalista : Julio Salinas
Editor : Chamot Nahac
