COVALIMA—-Autoridade Auduaneiru Covalima li iha Fronteira Postu Integradu Salele Tilomar, husu ba Komunidade sira hakarak sosa motoriza husi Atambua–indonesia tenke liu husi dalan legal, tanba alfadega bele fasilita hodi halo prosesu ba dokumentus importasaun.

Diretór Alfandega Munisipiu Covalima, Nunu Nugueira dehan wainhira komunidade hakarak sosa motor husi Atambua-Indonezia, persija deit halo pedidu ba Alfandega.

Tanba ne’e Servisu Alfandega iha Fronteira Salele Covalima nafatin apela ba komunidade sira atu hatama motor husi Atambua indonesia mai timor leste tenke liu husi dalan kegal no nia husi ba komunidade hotu atu hakbesik an ba alfadega hodi hetan informasaun kona–ba lalaok importsaun sasan mai Timor-Leste.

“Hau hakarak atu apela komunidade hotu atu sosa motorizada ruma husi Atambua tenke liu husi dalan legal, hakarak atu hatene informasaun ruma tenke hakbesik mai iha Alfandega para ami bele fo informasaun ne’ebe detallu kona-ba lalaok importasaun nian” informa Diretór Alfandega Munisípiu Covalima Nunu Nogueira ba jornalista sira iha nia kna’ar fatin Postu Integradu Mota Masin Salele, Postu Administrativu Tilomar, Segunda (04/04).

Nia husu ba komunidade liliu ba joven sira atu hola motorizada ruma uza ba privadu ne’e mai halo pedidu deit haruka ba nasional aprova, depois Alfandega print iha ne’e nia prosesu sai kedas, maibe antes atu hatama motor pedidu ne’e tenke mai kedas, no ba sira ne’ebe atu fa’an motorizada sira ne’e tenke iha lisensa komersiu ne’e tenke liu husi Diresaun Nasional Transporte no Trestre (DNTT) no Ministériu Komersiu.

Nia haktuir ba sasan sira nia presu selu tasa boot uitoan maka hanesan sigaru, mina, no tua maibe ba sasan nesesidade baziku ne’e selu tasa folin la Karun.

“Ba sasan sira ne’ebe hanesan sigaru, mina, inklui tua ne’e nia presu bo’ot uitoan, maibe ba sasan nesesidade baziku ne’ebe ita ema konsumu ne’e nia presu selu la karun” nia haktuir.

Entretantu dadaun ne’e Timor-Leste iha mundansa prusentazen taxa tuir lei tributariu nian hamotuk pursentu 7.5, Impor duty pusentu 5, sales tax Purssentu 2,5.(Azu)