.png)
Covalima (RCCT) 29-02-24-Administrador Postu Administrativu (APA) Suai realiza enkontru ho lider komunitaria no liña sektorais sira oinsa tau enkamiña informasaun ne’ebé prioridade liu ba Planu Dezenvolvimentu Integradu Munisipal (PDIM) 2025 nian.
Administrador Postu Administrativu Suai Idelfonso Maria Amaral, dehan Xefe Suku sira tenki kompriende didi’ak konaba prosesu atu halo elaborasaun ba PDIM nune’e bele submete proposta ba iha Postu Administrativu tuir nesesidade komunidade ninian iha suku.
“Objetivu ida ohin ha’u ho lider komunitaria inklui mos sektorais iha nivel postu administrativu atu enkamiña informasaun sobre planu programa ba 2025 nian, iha ne’eba ha’u halai liu ba suku sira liliu iha elaborasaun PDIM tanba tempu badak ami sei halo planu prioridade ba proposta ne’ebé hahu husi nivel aldeia, suku, ba postu to’o munisipiu ida ne’e mak ohin ami konvida xefe suku no xefe setorais sira, tanba iha mudansa kargu iha balu foun, iha balu kontinua ho ida ne’e mak ho ha’u nia seksaun no mos offisial sira esklarese formatu PDIM nian ba liña setorais no mos xefe suku sira atu intende didi’ak hodi nune’e bele halo prosesu elaborasaun PDIM iha nivel suku no sektorais bele submete proposta mai iha postu administrativu ida ne’e, ba programa ida ne’e.” informa APA Suai, Idelfonso Maria Amaral ba RCCT salaun Postu Administrativu Suai hafoin remata enkontru ho xefe suku no liña setorais sira.
Iha enkontru ida ne’e Xefe Suku Kamanasa, Fernando Noronha, hato’o preokupasaun ne’ebé durante komunidade Kamanasa infrenta konaba atu halo barajen “penahan/Boronjong” iha mota karau ulun hodi prevene be sa’e tama komunidade nia hela fatin.
“Mota karau tun maka’as fo impaktu ba komunidade aldeia Manekin no Fatuisin maka sai vitima ba inundasaun bainhira la halo penahan ka tau bronjong ruma iha mota ninin nun’e halo mota labele sae tama ba komunidade nia uma” Xefe Suku Kamanasa dehan.
.png)
Sikun seluk, Xefe Suku Beko, Arlindo Bernadinho Lemos, relata, durante ne’e komunidade iha Aldeia Gala, Teda no Tabur seidauk asesu dignu ba estrada, maske nune’e iha oitavu governu tekniku sira husi munisipiu halo ona survey maibe seidauk iha kontinuasaun, tanba ne’e nia husu atu kontinua hatama iha PDIM 2025.
“Estrada sa’e ba Aldeia Gala, Teda no liu ba iha Tobur tekniku administrasaun munisipiu ba halo ona survey dala rua, survey primeiru ha’u akompaña ho sira tekniku, segundu ha’u sei ba fali tan nafatin akompaña tekniku ba halo survey tan, iha momentu ne’eba ha’u husu ba tekniku sira hanesan ne’e tanba saida maka ita ba survey tiha ona agora mai survey tan hakarak halo ka lakohi halo, tan ne’e maka liu husi enkontru ida ne’e maizumenus ami bele tau hanesan prioridade tan ka lae tanba kondisaun estrada hahu husi Tudilpo ba Gala sei sa’e ba Teda liu ba Tobur araska tebes tanba ne’e ha’u husu atu kontinuasaun deit ka tau nafatin prioridade ida ohin ne’e” Xefe Suku Beko husu.
Entertantu Administrador Postu Administrativu Suai Idelfonso Maria Amaral realsa konaba, matadalan no indikativu ne’ebé iha ona Kada Suku sei Submete proposta rua ba PDIM Postu ba Planu implementesaun tinan 2025.
Jornalista : Julio Salinas
