Covalima (RCCT) 31-12-24-Servisu EDTL.EP, Munisipiu Covalima garantia Eletrisidade sei lamate durante selebrasaun tinan foun 2025 nian.
Xefe Unidade EDTL,EP Covalima Anorito Mendonça, informa, maske servisu tekniku iha terenu garante eletrisidade sei lakan iha ambitu selebrasaun tinan foun maibe hanesan umanu labele teri netik forsa natureze, maibe ekipa tekniku sira sei esforsu hodi garantia nafatin Eletridade sei lakan iha Selebrasaun Tinan Foun.
“Servisu tekniku, ita garante maibe ba forsa natureza ita labele espera tanba mate ne’e la’os xefe unidade no staf EDTL.EP sira maka ba hamate, maibe kuandu mate ona ne’e kestaun natureza, konaba tekniku nian ami garante ahi sei lamate” dehan Xefe Unidade EDTL.ep Munisipiu Covalima Anorito Mendonça.
Anorito Mendonça, husu ba komunidade Covalima tomak wainhira akontese eletrisidade mate iha aldeia ka suku ne’ebé deit, bele liga ba direta iha EDTL Covalima nune’e bele hatene lalais hodi tun kedas hodi halo intrevensaun.
“karik iha fatin balu maka hetan falla ahi mate husu ba komunidade sira bele hato’o lalais informasaun ba iha EDTL atu nune’e tekniku sira bele ba halo intervensaun lalais iha terenu” nia husu.
Enkuantu Xefe Unidade EDTL.ep Munisipiu Covalima Anorito Mendonça, garantia katak ahi sei la mate iha teritoriu Covalima laran tomak hodi selebra tinan foun, no nia nafatin husu ba komunidade tomak kuandu ahi mate passa lalais informasaun atu nune’e tekniku EDTL bele tun hodi halo intervensaun.
Jornalista : Julio Salinas
Editor : Chamot Nahac
