Covalima (RCCT) 27-12-24-Servisu Munisipal Asaun Sosial (SMAS) Munisipiu Covalima tau ona planu ba tinan 2025 sei sosa tan kareta Kareta Funerariu ida hodi apoiu tan kareta tolu seluk ne’ebé oras ne’e dadaun uza ba hala’o servisu tula ema mate.
Diretór Servisu Munisipal Asaun Sosial (SMAS) Munisipiu Covalima, Clementino Bere, hatete iha ona osan hamotuk dolar amerikanu rihun hat nulu resin tolu atu sosa kareta funerariu ida iha tinan 2025 mai.
“Iha tinan 2025 ne’e planu tanba iha ona orsamentu atu sosa tan kareta foun ida, iha momentu ne’e ami preve orsamentu atu sosa kareta ne’e la sala iha osan ho montante $ 43,000.00 ba sosa karu funerariu ida” informa Diretór Servisu Munisipal Asaun Sosial (SMAS) Munisipiu Covalima, Clementino Bere, ba jornalista sira iha Administrasaun Munisipiu Covalima.
Nia mos subliña konaba motorista kareta funerario ne’ebé oras ne’e iha hamutuk ema na’in-3 maibe husi sira ne’e na’in-1 maka seidauk hetan kontratu.
“Ami iha motorista na’in tolu maibe iha na’in-2 maka asina ona kontratu no na’in ida seluk seidauk asina kontratu, total kareta karu funerariu iha Covalima hamutuk tolu kondisaun sei di’ak hotu no to’o hela” nia dehan.
Tuir Diretór Servisu Munisipal Asaun Sosial (SMAS) Munisipiu Covalima, Clementino Bere, rekuñese Kareta Funerariu 3 ne’ebé dadaun ne’e Covalima iha sei ho kondisaun di’ak maibe utiliza ona hodi halo servisu durante tinan barak tan ne’e mak SMAS iha ona planu atu sosa tan kareta foun ida.
Jornalista : Julio Salinas
Editor : Chamot Nahac
