Covalima (RCCT) 19-12-24-Ministeriu Administrasaun Estatal liu husi ekipa tekniku Nasional no Munisipiu halo ona levantamentu hodi prepara Bill of Quantity (BOQ) ba konstrusaun edifisiu Balkaun Uniku (BU) iha Munisipiu Covalima.
Diretór Diresaun Nasional Simplifikasaun Administrativa no Plataforma Eletronika (DNSAPE), Benedito Escorial Fernandes, informa ekipa tekniku husi nasional kordenasaun ho Autoridade Munisipal hodi halo identifikasaun ba fatin atu hari edifisiu Balkaun Uniku iha Covalima.
“Depois ita halo lansamentu Balkaun Uniku (BU) iha Munisipiu Manatuto ne’ebé hatun kedas orientasaun ba ami nia tekniku sira, depois halo kordenasaun ho Autoridade Covalima nian identifika ona futuru edifisiu ba Balkaun Uniku nian ba sentru atendimentu iha Autoridade Covalima nian, tan ne’e ekipa tekniku sira halo ona levantamentu ba edifisiu ne’ebé futuru ba BU nian, depois halo levantamentu ekipa tekniku sira mos sei prepara hela dezenu final ba BOQ” informa Diretór DNSAPE, Benedito Escorial Fernandes, ba jornalista sira hafoin realiza disemina informasaun konaba Balkaun Uniku nian ba autoridade sira iha Munisipiu Covalima ne’ebé hala’o iha salaun Administrasaun Munisipiu Covalima, Kinta (19/12).
Nia afirma konaba prosesu dezeñu BOQ ne’e hetan mos apoiu husi parseiru dezenvolvimentu sira hanesan Ajensia onu nia United Nations Development Programme (UNDP) iha Timor-Leste.
“Ita mos hetan apoiu husi ita nia parte UNDP nian ne’ebé maka halo hela prosesu final dezenu BOQ nian, depois ida ne’e kuandu hetan ona final, loke konkursu hetan akompaña balu ne’ebé maka atu halo reabilitasaun ba futuru edifisiu BU nian, ita mos sei kontinua instala servisu BU nian ba autoridade iha Covalima” nia dehan.
Enkuantu prosesu final ba dezeñu BOQ hetan apoiu tekniku husi UNDP nune’e sei kontinua ba prosesu aprovizionamentu hodi loke konkursu, no iha tinan oin bele hala’o ona reabilitasaun ba edifisiu Balkaun Uniku iha Covalima.
Jornalista : Julio Salinas
Editor : Chamot Nahac
